04 April, 2026 10:18 AM IST | Mumbai | Gujarati Mid-day Correspondent
પહેલાં (તસવીર : આશિષ રાજે), અત્યારે (તસવીર : સાર્થક મહેતા)
ફોર્ટમાં ફૅશન સ્ટ્રીટ પર મહિલાઓ માટેના મોબાઇલ ટૉઇલેટના પાછળના ભાગમાં કાર્યરત ફૂડ-સ્ટૉલ બૃહન્મુંબઈ મ્યુનિસિપલ કૉર્પોરેશન (BMC)ના અધિકારીઓએ ગુરુવારે મોડી રાત્રે બંધ કરાવી દીધો હતો. આ ફૂડ-સ્ટૉલ વિશેનો રિપોર્ટ ‘મિડ-ડે’માં છપાયા પછી BMCએ આ કાર્યવાહી કરી હતી.
રેગ્યુલર મેઇન્ટેનન્સ વર્ક માટે રવિવારે હાર્બર અને ટ્રાન્સ-હાર્બર લાઇનમાં મેગા બ્લૉક રાખવામાં આવ્યો છે. હાર્બર લાઇનમાં સવારના ૧૧.૦૫ વાગ્યાથી સાંજના ૪.૦૫ વાગ્યા સુધી વાશી અને પનવેલ વચ્ચે આવતી અને જતી બન્ને લાઇન પર બ્લૉક રહેશે. બ્લૉકના આ સમય દરમ્યાન છત્રપતિ શિવાજી મહારાજ ટર્મિનસ ( CSMT)થી વાશી અને વાશીથી CSMT વચ્ચે કેટલીક સ્પેશ્યલ ટ્રેનો દોડાવવામાં આવશે. આ ઉપરાંત થાણેથી પનવેલ અને પનવેલથી થાણે દોડતી ટ્રાન્સ-હાર્બર લાઇનમાં સવારના ૧૦.૦૧ વાગ્યાથી બપોરના ૩.૨૦ વાગ્યા સુધી બ્લૉક રહેશે.
ચેમ્બુરના સુભાષનગરના બિલ્ડિંગ નંબર ૧૦નું વૈભવી લક્ષ્મી ડેવલપર્સ દ્વારા રીડેવલપમેન્ટ થઈ રહ્યું છે. ગઈ કાલે એ સાઇટ પર અકસ્માત થયો હતો. ચેમ્બુરના જ ઘાટલા વિલેજમાં રહેતા બાવન વર્ષના સિક્યૉરિટી ગાર્ડ નથુરામ સાખવિલકરનો ડ્યુટી પર પહેલો જ દિવસ હતો. તે સવારના ૭ વાગ્યે પાંચમા માળે આવેલા એલિવેટેડ પાર્કિંગની ચકાસણી કરતી વખતે સંતુલન ગુમાવીને ખાલી જગ્યામાંથી નીચે પટકાયો હતો. તરત જ આ બાબતની જાણ પોલીસ અને ફાયર-બ્રિગેડને કરવામાં આવી હતી. તેને ત્યાંથી બહાર કાઢીને રાજાવાડી હૉસ્પિટલમાં લઈ જવાયો હતો જ્યાં ડૉક્ટરોએ મૃત જાહેર કર્યો હતો.
લાલબાગની મિર્ચી ગલીમાં ગેરકાયદે મસાલા વેચતા વેપારીઓ પર શુક્રવારે BMCએ મોટી કાર્યવાહી હાથ ધરીને રાહદારીઓની અવરજવરમાં અવરોધ ઊભો કરતા સ્ટૉલ હટાવ્યા હતા. લાલબાગની મિર્ચી ગલી-મસાલા લેન એનાં વિવિધ પ્રકારનાં લાલ મરચાં, તડકામાં સૂકવેલાં મરચાં અને પાઉડર તેમ જ કસ્ટમ મસાલા માટે પ્રખ્યાત છે. હાલમાં મસાલાની સીઝન હોવાથી ગેરકાયદે ફેરિયાઓએ સ્ટૉલ શરૂ કરીને ધંધો કરવાથી લેન ભરાઈ જતી હતી અને એને કારણે રાહદારીઓને અવરજવરમાં તકલીફ પડતી હતી. F-સાઉથ વૉર્ડનાં અસિસ્ટન્ટ મ્યુનિસિપલ કમિશનર વૃષાલી ઇંગળેના નિર્દેશને અનુસરીને BMCના લાઇસન્સ અને જાળવણી વિભાગોએ પોલીસ-કર્મચારીઓ સાથે લેન ક્લિયર કરવા માટે આ કાર્યવાહી કરી હતી.
ગઈ કાલે ભારતીય મોસમ વિભાગે હિમાચલ પ્રદેશના લાહૌલ-સ્પીતિ પાસેની અટલ ટનલ નજીક હિમસ્ખલનની સંભાવનાઓને કારણે સહેલાણીઓની મૂવમેન્ટને સીમિત કરી હતી. આજે અને આવતી કાલે બર્ફીલા તોફાનની સંભાવનાને કારણે સહેલાણીઓ માટે આ રસ્તો બંધ કરવામાં આવ્યો છે. જોકે મોસમ બગડે એ પહેલાં ગઈ કાલે અહીં સહેલાણીઓએ બરફની મજા લૂંટી હતી.
