17 August, 2026 02:57 PM IST | Mumbai | Gujarati Mid-day Correspondent
તસવીર સૌજન્યઃ મિડ-ડે ફોટોગ્રાફર્સ
દક્ષિણ મુંબઈના ધમધમતા ચર્ચગેટ (Churchgate) વિસ્તારમાં સોમવાર, ૧૭ ઓગસ્ટના રોજ એક વિશાળ વૃક્ષ અચાનક ઉખડીને ચાર વાહનો પર ખાબકતાં બે લોકો ઈજાગ્રસ્ત થયા છે. આ ઘટના કેલન ભવન સામે B-2 મેટ્રો સ્ટેશનના પ્રવેશદ્વાર અને સ્થાનિક ખાણીપીણીની દુકાન નજીક બની હતી, જેના કારણે વાહન વ્યવહાર ક્ષણભર માટે ખોરવાયો હતો અને રાહદારીઓમાં અફરાતફરી મચી ગઈ હતી.
પ્રત્યક્ષદર્શીઓ અને સ્થાનિક સત્તાવાળાઓના જણાવ્યા અનુસાર, અચાનક વૃક્ષ ધરાશાયી થતાં ત્યાંથી પસાર થતાં અને પાર્ક કરેલા ચાર વાહનો કચડાઈ ગયા હતા, જેમાં બે કાળી-પીળી ટેક્સીઓનો પણ સમાવેશ થાય છે. વૃક્ષના વજનદાર ડાળખાં અને પાંદડાઓ નીચે વાહનો દબાઈ ગયા હતા.
તબીબી સૂત્રોએ પુષ્ટિ કરી છે કે આ ઘટનામાં એક ટેક્સી ચાલક સહિત બે લોકોને ઈજા પહોંચી છે, જે વૃક્ષ પડ્યું ત્યારે પોતાની ગાડીની અંદર જ હતો. ઇમરજન્સી મેડિકલ ટીમે ઈજાગ્રસ્તોને સ્થળ પર જ પ્રાથમિક સારવાર આપીને વધુ તપાસ માટે ખસેડ્યા હતા.
ઘટનાની જાણ થતાં જ મુંબઈ ફાયર બ્રિગેડ (MFB), સ્થાનિક પોલીસ અને બૃહન્મુંબઈ મ્યુનિસિપલ કોર્પોરેશન (BMC) ના A-વોર્ડનો સ્ટાફ બચાવ કામગીરી માટે ઘટનાસ્થળે પહોંચી ગયો હતો.
ઇમરજન્સી કર્મચારીઓએ વુડ-કટર્સ અને હેવી લિફ્ટિંગ સાધનોની મદદથી મોટી ડાળીઓ કાપીને દબાયેલી ટેક્સીઓને બહાર કાઢી હતી અને મુખ્ય રસ્તા પરથી કાટમાળ હટાવ્યો હતો. ટ્રાફિક પોલીસે દક્ષિણ મુંબઈના આ મહત્વપૂર્ણ માર્ગ પર જામ ન સર્જાય તે માટે વાહનોને નજીકની ગલીઓ તરફ ડાયવર્ટ કર્યા હતા.
આ ઘટનાએ મુંબઈમાં ચોમાસા દરમિયાન વૃક્ષોની સુરક્ષા અંગે નાગરિકોની ચિંતા ફરી વધારી દીધી છે. નાગરિક અહેવાલો મુજબ, છેલ્લા અઢી મહિનામાં મુંબઈમાં વૃક્ષો કે ડાળીઓ ધરાશાયી થવાની ૨,૧૦૦ થી વધુ ઘટનાઓ નોંધાઈ છે, જેના કારણે મિલકતોને નુકસાન, ટ્રાફિક જામ અને અનેક લોકો ઈજાગ્રસ્ત થયા છે.
સ્થાનિક નાગરિકો અને સામાજિક કાર્યકરોએ આવી દુર્ઘટનાઓ અટકાવવા માટે B.M.C. ના ગાર્ડન વિભાગને ચોમાસા પહેલાં વૃક્ષોનું ટ્રીમિંગ સઘન બનાવવાની, જૂના અને નબળા વૃક્ષોની ઓળખ કરવાની તેમજ વધુ ભીડભાડવાળા વિસ્તારોમાં રહેલા જોખમી વૃક્ષોનું ઓડિટ કરવાની માંગ કરી છે.
તાજેતરમાં ઘટેલી વૃક્ષ ધરાશાયી થવાની ઘટનાએ મુંબઈ મહાનગરપાલિકાના ચોમાસા પૂર્વેના આયોજન અને તૈયારીઓ પર ફરી એકવાર સવાલો ઊભા કર્યા છે. ખાસ કરીને ભારે જનમેદની અને વાહનોની સતત અવરજવર ધરાવતા વેપારી વિસ્તારોમાં આવી ઘટનાઓ ગંભીર જાનહાનિનું જોખમ વધારી દે છે. ચર્ચગેટની આ દુર્ઘટનાએ રસ્તા કિનારે આવેલા જોખમી અને જૂના વૃક્ષોની યોગ્ય તપાસ તેમજ જાળવણી સામે પણ મોટા પ્રશ્નાર્થ ચિહ્નો સર્જ્યા છે, કારણ કે ચોમાસાની ઋતુ દરમિયાન શહેર સતત હવામાન સંબંધિત આવી મુશ્કેલીઓનો સામનો કરી રહ્યું છે.
