મુંબઈ-પુણે એક્સપ્રેસવે પર ચાલતી બસમાં લાગી આગ, પ્રવાસીઓનો આબાદ બચાવ

Mumbai-Pune Expressway bus fire near Panvel: આજે સવારે મુંબઈ-પુણે એક્સપ્રેસવે પર પનવેલ નજીક ખાનગી બસમાં ભીષણ આગ લાગી; સદ્નસીબે તમામ ૧૪ પ્રવાસીઓનો આબાદ બચાવ થયો; આગની ઘટનાને પગલે એક્સપ્રેસવે પર વાહનવ્યવહારની ગતી ધીમી પડી

પ્રતીકાત્મક ફાઇલ તસવીર

મુંબઈ-પુણે એક્સપ્રેસવે (Mumbai-Pune Expressway) પર પનવેલ (Panvel) નજીક ગુરુવારે સવારે એક ખાનગી સ્લીપર બસમાં ભીષણ આગ લાગતાં ભારે અફરાતફરી સર્જાઈ હતી. જોકે, બસ સળગીને ખાખ થઈ જાય તે પહેલાં જ તેમાં સવાર તમામ ૧૪ પ્રવાસીઓને સુરક્ષિત રીતે બહાર કાઢી લેવાતાં મોટી દુરઘટના ટળી હતી. ઘટનામાં કોઈ જાનહાનિ કે ઈજા થવાના અહેવાલ નથી. ઈમરજન્સી રિસ્પોન્સ ટીમ અને ફાયર બ્રિગેડે ઘટનાસ્થળે પહોંચીને આગ પર કાબૂ મેળવ્યો હતો, જોકે આગના કારણે વ્યસ્ત એક્સપ્રેસવે પર થોડા સમય માટે વાહનવ્યવહાર ખોરવાયો હતો.

પુણે તરફ જતી લેન પર બની આ દુર્ઘટના

આ બનાવ સવારે આશરે ૭:૫૫ વાગ્યે રસાયણી પોલીસ મથકની હદમાં પુણે (Pune) તરફ જતી લેન પર ૧૬ કિલોમીટરના પોઈન્ટ નજીક બન્યો હતો. પ્રત્યક્ષદર્શીઓ અને સ્થાનિક સત્તાવાળાઓના જણાવ્યા અનુસાર, ચાલુ બસમાંથી અચાનક ધુમાડો નીકળતો દેખાયો હતો. ખતરો ભાંપી જઈને બસ ચાલકે તાત્કાલિક વાહનને રસ્તાની સાઈડમાં ઊભું રાખી દીધું હતું અને મુસાફરોને સાવચેત કર્યા હતા.

ચાલક અને કંડક્ટરની સમયસૂચકતાના કારણે આગ (Mumbai-Pune Expressway bus fire near Panvel) આખી સ્લીપર કેબિનમાં ફેલાય તે પહેલાં જ તમામ ૧૪ પ્રવાસીઓ સામાન સાથે ઝડપથી નીચે ઉતરી ગયા હતા. જોતજોતામાં આગની જ્વાળાઓએ આખી બસને લપેટમાં લઈ લીધી હતી અને બસ બળીને ખાખ થઈ ગઈ હતી.

ફાયર બ્રિગેડે આગ પર કાબૂ મેળવ્યો, વાહનવ્યવહાર પૂર્વવત કરાયો

ઘટનાની જાણ થતાં જ પનવેલ મહાનગરપાલિકા અને ખોપોલી નગરપાલિકાના ફાયર બ્રિગેડના બંબા ઘટનાસ્થળે પહોંચી ગયા હતા. તેમની સાથે મહારાષ્ટ્ર સ્ટેટ રોડ ડેવલપમેન્ટ કોર્પોરેશન (Maharashtra State Road Development Corporation - MSRDC) ની પેટ્રોલીંગ ટીમ અને સ્થાનિક પોલીસ કાફલો પણ આવી પહોંચ્યો હતો.

અગ્નિશામક દળે (Fire Brigade) પાણીનો મારો ચલાવીને ટૂંક સમયમાં જ આગ પર સંપૂર્ણ કાબૂ મેળવી લીધો હતો. અધિકારીઓએ પુષ્ટિ કરી હતી કે અટવાયેલા પ્રવાસીઓને પુણે તરફની આગળની મુસાફરી માટે અન્ય વાહનની વ્યવસ્થા કરીને રવાના કરવામાં આવ્યા હતા. ત્યારબાદ એક્સપ્રેસવે પરથી બસનો કાટમાળ હટાવીને વાહનવ્યવહાર પૂર્વવત શરૂ કરવામાં આવ્યો હતો.

આગનું કારણ જાણવા પોલીસની તપાસ શરૂ

આગ લાગવાનું ચોક્કસ કારણ હજુ તપાસ હેઠળ છે, પરંતુ પ્રાથમિક અનુમાન મુજબ એન્જિનમાં ઇલેક્ટ્રિક શોર્ટ સર્કિટ અથવા મિકેનિકલ ઓવરહિટીંગના કારણે આ અકસ્માત સર્જાયો હોવાની આશંકા છે. પોલીસ અધિકારીઓએ જણાવ્યું હતું કે આગ લાગવાના સાચા કારણની પુષ્ટિ કરવા માટે બસના બળેલા માળખાની ટેકનિકલ તપાસ કરવામાં આવશે.

હાઈવે પોલીસે ખાનગી બસ ઓપરેટરો અને કોમર્શિયલ વાહન માલિકો માટે સુરક્ષા માર્ગદર્શિકા પુનઃઉચ્ચારી છે, જેમાં લાંબા અંતરના રૂટ પર દોડતા વાહનોનું નિયમિત મેન્ટેનન્સ, થર્મલ ઇન્સ્પેક્શન અને વાહનમાં અગ્નિશામક યંત્રો (ફાયર એક્સટિંગ્વિશર) ચાલુ હાલતમાં રાખવા પર ભાર મૂકવામાં આવ્યો છે.