મુંબઈ-પુણે એક્સપ્રેસવે કનેક્ટિંગ લિંક: ૧ નવેમ્બરથી માલવાહક વાહનો પર પ્રતિબંધ, કાર માટે સ્પીડ લિમિટ સેટ

Mumbai-Pune Expressway Missing Link: મહારાષ્ટ્ર પોલીસે ૧ નવેમ્બરથી મુંબઈ-પુણે એક્સપ્રેસવેની કનેક્ટિંગ લિંક પર તમામ માલવાહક અને જોખમી સામગ્રી વહન કરતા વાહનોના ઉપયોગ પર પ્રતિબંધ મૂક્યો; આ માર્ગ પર ખાનગી કાર અને પેસેન્જર બસોને અવરજવરની મંજૂરી રહેશે

ફાઇલ તસવીર

મુંબઈ (Mumbai) અને પુણે (Pune) વચ્ચે મુસાફરી કરતા વાહનચાલકો માટે ૧ નવેમ્બર, ૨૦૨૬ થી એક્સપ્રેસવેની `મિસિંગ લિંક` (Missing Link) પર નવા ટ્રાફિક નિયમો લાગુ કરવામાં આવશે, જે અંતર્ગત કોમર્શિયલ માલવાહક વાહનોને આ માર્ગ પર પ્રવેશ આપવામાં આવશે નહીં. આ નવા નિર્દેશ હેઠળ ટનલ નેટવર્કમાં માર્ગ સુરક્ષા અને વાહનોની સુચારૂ અવરજવરને પ્રાથમિકતા આપતાં કાર અને પેસેન્જર બસો માટે અલગ-અલગ ગતિ મર્યાદા (Speed Limits) પણ નક્કી કરવામાં આવી છે.

મહારાષ્ટ્ર હાઈવે પોલીસ (Maharashtra Highway Police)એ યશવંતરાવ ચવ્હાણ મુંબઈ-પુણે એક્સપ્રેસવે (Mumbai-Pune Expressway)ની નવસર્જિત કનેક્ટિંગ લિંક (જે અગાઉ `મિસિંગ લિંક` તરીકે ઓળખાતી હતી) પર કાયમી ટ્રાફિક નિયંત્રણોની જાહેરાત કરી છે. ૧ નવેમ્બર, ૨૦૨૬ થી તમામ માલવાહક વાહનો, જેમાં પિકઅપ વાન અને ટાટા એસ (Tata Ace) જેવા વ્યાપારી વાહનોનો પણ સમાવેશ થાય છે, તેમના માટે આ કનેક્ટિંગ લિંકનો (Mumbai-Pune Expressway Missing Link) ઉપયોગ કરવા પર સખત મનાઈ ફરમાવવામાં આવી છે.

એડિશનલ ડાયરેક્ટર જનરલ ઓફ પોલીસ (ટ્રાફિક) પ્રવીણ સાળુંખે દ્વારા જારી કરવામાં આવેલા નોટિફિકેશનમાં સ્પષ્ટ કરવામાં આવ્યું છે કે, આ વિભાગ પર આવેલી જટિલ ટનલ (બોગદા) ઈન્ફ્રાસ્ટ્રક્ચરમાંથી પસાર થતા મુસાફરોની સુરક્ષા અને વાહનોની અવરજવરને સુચારૂ બનાવવા માટે આ નિયંત્રણો લાદવામાં આવ્યા છે.

જોખમી કાર્ગો પર પ્રતિબંધ, કોમર્શિયલ વાહનોને જૂના મૂળ માર્ગ પર ડાયવર્ટ કરાશે

નવા નિયમનકારી માળખા હેઠળ, જ્વલનશીલ, વિસ્ફોટક અથવા જોખમી સામગ્રી વહન કરતા વાહનોના પ્રવેશ પર પણ કનેક્ટિંગ લિંકમાં પ્રતિબંધ મૂકવામાં આવ્યો છે. આ આદેશ માર્ગ પરિવહન અને રાજમાર્ગ મંત્રાલય (Ministry of Road Transport and Highways - MoRTH) દ્વારા લાંબી ટનલ ટ્રાન્સપોર્ટ સિસ્ટમ માટે જારી કરવામાં આવેલા સુરક્ષા પ્રોટોકોલને અનુરૂપ છે.

તમામ પ્રતિબંધિત માલવાહક વાહનો, ભારે પરિવહન ટ્રકો અને જોખમી કાર્ગો વાહનોએ મુંબઈ-પુણે એક્સપ્રેસવેના મૂળ જૂના માર્ગ પરથી પસાર થવાનું રહેશે. ગેરકાયદેસર રીતે પ્રવેશતા કોમર્શિયલ વાહનોને ટનલ કોરિડોરમાં જતા રોકવા માટે હાઈવે ઓથોરિટીના જવાનો એન્ટ્રી પોઈન્ટ પર કડક તપાસ કરશે.

પ્રાઇવેટ એલએમવી (LMV) અને પેસેન્જર બસોને પ્રવેશની મંજૂરી

આ કનેક્ટિંગ લિંક ખાનગી કાર, જીપ અને અન્ય બિન-વ્યાપારી લાઇટ મોટર વ્હીકલ્સ (LMV) તેમજ રાજ્ય પરિવહન અને ખાનગી પેસેન્જર બસો માટે ચાલુ રહેશે. આ ટ્રાફિક મેનેજમેન્ટ વ્યૂહરચનાનો મુખ્ય હેતુ લાંબી ટનલની અંદર સુરક્ષા જોખમો ઘટાડીને હળવા વાહનો અને આંતર-શહેરી બસ નેટવર્કની અવરજવરને ઝડપી બનાવવાનો છે.

હાઈવે પોલીસ અધિકારીઓએ સ્પષ્ટ કર્યું હતું કે ટનલ વેન્ટિલેશન, ફાયર સેફ્ટી સિસ્ટમ્સ અને સ્ટ્રક્ચરલ ડિઝાઇન પેરામીટર્સના ટેકનિકલ મૂલ્યાંકન બાદ પ્રતિબંધનો આ નિર્ણય આખરી કરવામાં આવ્યો છે.

ગતિ મર્યાદા ફરજિયાત, નિયમભંગ બદલ કડક દંડ થશે

સત્તાવાર નોટિફિકેશનમાં કનેક્ટિંગ લિંક પર પરવાનગી પ્રાપ્ત વાહનો માટે ચોક્કસ સ્પીડ મર્યાદા ફરજિયાત કરવામાં આવી છે. ખાનગી કાર અને LMV માટે મહત્તમ ઝડપ મર્યાદા ૧૦૦ કિમી/કલાક નક્કી કરવામાં આવી છે, જ્યારે પેસેન્જર બસો અને જાહેર પરિવહન વાહનો માટે મહત્તમ ઝડપ ૮૦ કિમી/કલાક સુધી મર્યાદિત રહેશે.

ટ્રાફિક સત્તાવાળાઓએ નોંધ્યું છે કે મોટર વાહન અધિનિયમ, ૧૯૮૮ ની કલમ ૧૮૩ હેઠળ કાયદાકીય કાર્યવાહી કરવામાં આવશે, જોકે જો વાહનની નોંધાયેલી ઝડપ નિર્ધારિત મર્યાદાના ૫ ટકા સુધીની અંદર હશે તો ઝડપ મર્યાદાના ઉલ્લંઘન બદલ દંડ કરવામાં આવશે નહીં. વાહનચાલકોને કનેક્ટિંગ લિંકની ટનલમાંથી વાહન ચલાવતી વખતે સ્પીડ સાઇનબોર્ડ ધ્યાને લેવા અને લેન શિસ્તનું પાલન કરવા સખત સલાહ આપવામાં આવી છે.