મુંબઈમાં જોરદાર પવન સાથે હળવા વરસાદની સંભાવના, આજે શહેરમાં IMDનું ‘યલો એલર્ટ’

Mumbai Weather Updates: મુંબઈમાં આજે હળવા વરસાદી ઝાપટાં અને ભારે પવનની હવામાન વિભાગે કરી આગાહી, સામાન્ય રીતે વાદળછાયું આકાશ, આઇએમડીએ આપ્યું ‘યલો એલર્ટ’; સતત પડેલા ભારે વરસાદ બાદ શહેરની હવાની ગુણવત્તા `ઉત્તમ` શ્રેણીમાં

તસવીરઃ શાદાબ ખાન

શહેરમાં બે દિવસના ભારે વરસાદ (Mumbai Rains) પછી પણ મુંબઈ (Mumbai)માં શુક્રવારે પણ યલો એલર્ટ (Yellow Alert in Mumbai) યથાવત રાખવામાં આવ્યું છે. મુંબઈગરાઓની શુક્રવારની સવાર હળવા વરસાદી ઝાપટાં અને તેજ પવન સાથે થઈ હતી. ભારતીય હવામાન વિભાગે (India Meteorological Department) આજે પણ શહેર અને ઉપનગરોમાં વરસાદી માહોલ જળવાઈ રહેવાની શક્યતા વ્યક્ત કરી છે. આગામી ૨૪ કલાક દરમિયાન મુંબઈ અને તેના આસપાસના વિસ્તારોમાં મધ્યમથી ભારે વરસાદ તેમજ કેટલાક છૂટાછવાયા વિસ્તારોમાં અતિભારે વરસાદની આગાહી (Mumbai Weather Updates) કરવામાં આવી છે.

પ્રાદેશિક હવામાન કેન્દ્ર (Regional Meteorological Centre), મુંબઈ દ્વારા ૬૦ થી ૭૦ કિમી પ્રતિ કલાકની ઝડપે જોરદાર પવન ફૂંકાવાની ચેતવણી પણ આપવામાં આવી છે. આ હવામાનને કારણે નીચાણવાળા વિસ્તારોમાં જળબંબાકાર, ટ્રાફિક જામ અને વાહનવ્યવહાર સેવાઓમાં વિક્ષેપ પડી શકે છે.

આજનું હવામાન અપડેટ

હવામાન વિભાગ (IMD)ના જણાવ્યા અનુસાર, મુંબઈ શહેર અને ઉપનગરોમાં દિવસભર વાદળછાયું વાતાવરણ રહેશે. ભારે વરસાદના સ્પેલ દરમિયાન ૫૦ થી ૬૦ કિમી પ્રતિ કલાકની ઝડપે પવન ફૂંકાય તેવી શક્યતા છે. શહેરમાં મહત્તમ તાપમાન ૨૯ ડિગ્રી સેલ્સિયસ અને ન્યૂનતમ તાપમાન ૨૮ ડિગ્રી સેલ્સિયસની આસપાસ નોંધાઈ શકે છે.

હવામાન વિભાગે છૂટાછવાયા સ્થળોએ ગાજવીજ અને પવન સાથે ભારેથી અતિભારે વરસાદની ચેતવણી આપી છે. ખાસ કરીને પૂરની સંભાવના ધરાવતા વિસ્તારોમાં મુસાફરી કરતી વખતે રહેવાસીઓને સાવચેત રહેવાની સલાહ આપવામાં આવી છે.

વીકેન્ડથી વરસાદનું જોર ઘટશે

વરસાદ અંગેની ચિંતાઓ વચ્ચે, શુક્રવાર પછી હવામાનની સ્થિતિમાં ધીમે ધીમે સુધારો થવાની ધારણા છે. શનિવાર અને રવિવારથી વરસાદની તીવ્રતા ઘટે તેવી શક્યતા છે અને આગામી ચાર દિવસ દરમિયાન મુંબઈમાં વધારે કે અસાધારણ વરસાદ થવાની આગાહી નથી.

જળાશયોમાં પાણીનું સ્તર વધ્યું

સતત વરસાદના કારણે શહેરના જળાશયોના જળસ્તરમાં જોરદાર ઉછાળો આવ્યો છે. છેલ્લા ૨૪ કલાકમાં જ તળાવોનો કુલ જળસંગ્રહ ૭.૮૮ ટકા વધીને ૭૭.૬૨ ટકા પર પહોંચી ગયો છે, જેમાં વિહાર, તુલસી અને મોડક સાગર તળાવો સંપૂર્ણ ક્ષમતા સાથે ઓવરફ્લો થઈ રહ્યા છે. વરસાદનું જોર ઘટવાથી છેલ્લા કેટલાક દિવસોથી પાણી ભરાવા અને ટ્રાફિકની સમસ્યાથી ઝઝૂમી રહેલા મુંબઈગરાઓને મોટી રાહત મળશે.

મુંબઈની હવા ગુણવત્તા `ઉત્તમ` શ્રેણીમાં યથાવત

તાજેતરમાં પડેલા ચોમાસાના વરસાદી ઝાપટાં બાદ શહેરની હવાની ગુણવત્તા (Air Quality Index) `ઉત્તમ` (Good) શ્રેણીમાં જળવાઈ રહી છે. સત્તાવાર આંકડા અનુસાર, શુક્રવારે સવારે મુંબઈનો ઓવરઓલ એર ક્વોલિટી ઈન્ડેક્સ (AQI) ૧૯ નોંધાયો હતો, જે જાહેર આરોગ્ય પર નહિવત અસર દર્શાવે છે. ગુણવત્તાના માનક વર્ગીકરણ અનુસાર, ૦ થી ૫૦ વચ્ચેનો AQI આંકડો `ઉત્તમ` શ્રેણીમાં ગણવામાં આવે છે, જે સ્વચ્છ હવા અને સામાન્ય જનતા માટે આરોગ્યનું નહિવત જોખમ દર્શાવે છે.