01 April, 2025 02:43 PM IST | Mumbai | Gujarati Mid-day Correspondent
‘ધ નેસ્ટ’ એલિવેટેડ વૉકવે
બૃહન્મુંબઈ મ્યુનિસિપલ કૉર્પોરેશન (BMC)એ પચીસ કરોડ રૂપિયાના ખર્ચે મલબાર હિલમાં ‘ધ નેસ્ટ’ નામનો એલિવેટેડ વૉકવે રવિવારે લોકો માટે ખુલ્લો મૂક્યો હતો. પહેલા જ દિવસથી લોકોમાં એ આક્રર્ષણનું કેન્દ્ર બન્યો છે અને વધુ ને વધુ લોકો એની મુલાકાત લઈ રહ્યા છે. બે જ દિવસમાં ૩૪૦૦ કરતાં વધુ લોકો એની મુલાકાત લઈ ચૂક્યા છે.
ગુઢીપાડવાના દિવસે જ ૧૦૫૩ મુંબઈગરાઓ અને સહેલાણીઓએ એની મુલાકાત લીધી હતી. ભારતીયો માટે આ વૉકવેની પચીસ રૂપિયાની ટિકિટ રખાઈ છે, જ્યારે વિદેશીઓ માટે ૧૦૦ રૂપિયાની ટિકિટ છે. આમ પહેલા જ દિવસે ટિકિટ-વેચાણથી ૨૬,૯૨૫ રૂપિયાની આવક થઈ હતી. ગઈ કાલે ૩૧ માર્ચે ૨૩૪૬ લોકોએ એની મુલાકાત લીધી હતી જેમાંથી ૬૦,૩૦૦ રૂપિયાની આવક થઈ હતી.
આ વૉકવે પર વધુ લોકો ન જાય અને તેમની સુરક્ષા જળવાઈ રહે એ માટે એકસાથે ૨૦૦ લોકોને છોડવામાં આવે છે. રોજ સવારે પાંચથી રાતે ૯ વાગ્યા સુધી આ વૉકવે ખુલ્લો રહેવાનો છે. લોકો ઍડ્વાન્સમાં પ્લાન કરી ઑનલાઇન એની ટિકિટ બુક કરી શકે એવી ગોઠવણ કરવામાં આવી છે. વીક-એન્ડ માટે ઑલરેડી લોકો ઇન્ક્વાયરી અને સ્લૉટ બુકિંગ કરી રહ્યા છે.