24 April, 2026 08:09 AM IST | Mumbai | Gujarati Mid-day Correspondent
વાઇરલ વિડીયોમાંથી સ્ક્રીનશૉટ
ગોવંડીમાં ગઈ કાલે બપોરે લાગેલી આગમાં ઓછામાં ઓછાં ૧૨ ફોર-વ્હીલરને નુકસાન થયું હતું. ઘાટકોપર-માનખુર્દ લિન્ક રોડ પર બૈંગણવાડી સિગ્નલ પાસે સવારે ૧૧.૪૫ વાગ્યાની આસપાસ આગ લાગી હતી. એવું કહેવાય છે કે આ ગેરકાયદે પાર્કિંગ-સાઇટ હતી અને ઘણાં છોડી દેવાયેલાં ફોર-વ્હીલર ત્યાં લાંબા સમયથી પાર્ક કરાયેલાં હતાં. એક કારનું કમ્પ્રેસ્ડ નૅચરલ ગૅસ (CNG) સિલિન્ડર ફાટવાને કારણે આ આગ લાગી હતી. એણે તરત જ આજુબાજુની ૧૦થી ૧૨ કારને પણ ઝપટમાં લઈ લીધી હતી. ત્યાં હાજર લોકોએ વધુ કાર આગની ઝપટમાં ન આવે એ માટે ધક્કા મારીને બંધ કારોને ત્યાંથી હટાવવાના પ્રયાસ કર્યા હતા. પોલીસ-ઑફિસરે કહ્યું હતું કે આ ઘટનામાં કોઈને ઈજા થઈ નથી. અડધો કલાક બાદ આગ પર કાબૂ મેળવી લેવામાં આવ્યો હતો.
વિરારમાં વિવા કૉલેજ પાસે એક ચાલતી રિક્ષામાં આગ લાગી હતી. આગ લાગ્યાની જાણ થતાં તરત જ રિક્ષા-ડ્રાઇવરે રિક્ષા રોડની એક સાઇડ લગાવી દીધી હતી અને તે પણ રિક્ષાની બહાર આવી ગયો હતો. થોડી જ ક્ષણોમાં આગ વધી જતાં આજુબાજુના લોકો મદદ માટે દોડ્યા હતા. કોઈએ બાલદી-બાલદીએ પાણી નાખીને આગ ઓલવવાનો પ્રયાસ કર્યો હતો, જ્યારે કેટલાક દુકાનદારોએ તેમની પાસેનાં ફાયર એક્સ્ટિંગ્વિશર વાપર્યાં હતાં અને આગ ઓલવી હતી. આગમાં કોઈ જખમી થયું નહોતું, પણ રિક્ષાને બહુ જ નુકસાન થયું હતું. ઓવરહીટને કારણે આગ લાગી હોવાની શક્યતા પ્રાથમિક દૃષ્ટિએ દર્શાવાઈ હતી.
