બન્ને NCPના મર્જરની વાતો વચ્ચે સુનેત્રા પવાર મળવા ગયાં મુખ્ય પ્રધાન દેવેન્દ્ર ફડણવીસને, રાજકારણમાં ગરમાટો

નૅશનલિસ્ટ કૉન્ગ્રેસ પાર્ટી (NCP)ના બન્ને જૂથનું મર્જર થવાની વાતોએ છેલ્લા કેટલાક દિવસથી રાજ્યના રાજકારણમાં ગરમાટો લાવી દીધો છે

દેવેન્દ્ર ફડણવીસ

નૅશનલિસ્ટ કૉન્ગ્રેસ પાર્ટી (NCP)ના બન્ને જૂથનું મર્જર થવાની વાતોએ છેલ્લા કેટલાક દિવસથી રાજ્યના રાજકારણમાં ગરમાટો લાવી દીધો છે ત્યારે ગઈ કાલે રાજ્યનાં ડેપ્યુટી ચીફ મિનિસ્ટર અને NCPનાં વડાં સુનેત્રા પવારે મુખ્ય પ્રધાન દેવેન્દ્ર ફડણવીસ સાથે મીટિંગ કરી હતી. એને લઈને રાજકીય પંડિતોએ અટકળો મૂકવાની શરૂ કરી દીધી હતી. 
એ પછી પત્રકારો સાથે વાત કરતાં દેવેન્દ્ર ફડણવીસે કહ્યું હતું કે ‘સુનેત્રાતાઈ શાસકીય કામકાજ માટે અમારી પાસે આવ્યાં હતાં. અમારી વચ્ચે NCPના મર્જરને લઈને કોઈ જ ચર્ચા થઈ નથી. હું ફરી એક વાર કહું છું કે મર્જર સંદર્ભે જો કોઈ ચર્ચા હોત તો તેમણે અમારી સાથે એ બાબતે ચોક્કસ કરી હોત, કારણ કે અમે સત્તામાં છીએ. મર્જરની ચર્ચાઓ ફક્ત મીડિયામાં જ જોવા મળે છે. હકીકતમાં આ બદલ અમને કોઈએ પણ એ વિશે કહ્યું નથી. એથી આ સંદર્ભે બોલવું યોગ્ય નહીં ગણાય. સુનેત્રા પવાર સાથે થયેલી ચર્ચામાં મર્જરની કોઇ વાત થઈ નથી.’