એક જ મહિનાના બાળકને ૧.૨૦ લાખમાં વેચીને એ પૈસાથી સ્માર્ટફોન અને સોનું ખરીદ્યાં સગાં મા-બાપે

ઘટનાની જાણ થયા પછી પોલીસે ઝડપી તપાસ ચલાવીને ૪૮ કલાકમાં એ બાળકને બચાવ્યું ત્યાં સુધીમાં એ ૪ વાર વેચાઈ ચૂક્યું હતું અને છત્રપતિ સંભાજીનગરથી નાંદેડ થઈને તેલંગણ પહોંચી ગયું હતું

બાળકને બચાવનાર પોલીસની ટીમ.

છત્રપતિ સંભાજીનગરમાં ચોંકાવનારી ઘટના બની છે. એક જ મહિનાના બાળકનો તેનાં સગાં મા-બાપે ૧.૨૦ લાખ રૂપિયામાં સોદો કરી તેને વેચી દીધું હતું. બાળકને વેચીને મળેલા પૈસામાંથી તેમણે બન્નેએ સ્માર્ટફોન ખરીદ્યા હતા એટલું જ નહીં, વધેલા પૈસામાંથી ૬૨,૦૦૦ રૂપિયાનું સોનું ખરીદ્યું હતું. 
સંભાજીનગરના મુકુંદનગર પોલીસે આપેલી માહિતી મુજબ તેમને આ માહિતી મળતાં જ ઝડપી પગલાં લીધાં હતાં અને ૪૮ કલાકમાં જ એ બાળકને બચાવી લીધું હતું. આ ૪૮ કલાકમાં જ અલગ-અલગ માધ્યમથી તે ચાર વખત વેચાયું હતું. છત્રપતિ સંભાજીનગરમાંથી નાંદેડ માર્ગે તેને ઠેઠ તેલંગણ લઈ જવાયું હતું જેમાં એ બાળકની કિંમત ૨.૭૦થી વધીને ૩.૫૦ લાખ કરી નખાઈ હતી અને એ ભાવે એ આગળ વેચાયું હતું. પોલીસે એક પછી એક કડીઓ ભેગી કરીને આખરે બાળકને હૈદરાબાદથી બચાવી લીધું હતું. પોલીસે બાળક વેચવાના આ ઇન્ટરસ્ટેટ રૅકેટમાં બાળકનાં 
માતા-પિતા સહિત કુલ ૭ જણની આ કેસમાં ધરપકડ કરી છે. હાલ બાળકની સોંપણી બાલ કલ્યાણ સમિતિને કરવામાં આવી છે. હજી કેટલા લોકો આ બાળક વેચવાના રૅકેટમાં સંડાવાયેલા છે એની વધુ તપાસ પોલીસ કરી રહી છે.