13 May, 2026 12:55 PM IST | Mumbai | Gujarati Mid-day Correspondent
પ્રતીકાત્મક તસવીર
કલ્યાણ રેલવે-સ્ટેશન અને એની આસપાસના વિસ્તારોમાં સોમવારે મોડી રાત્રે પોલીસે કૉમ્બિંગ ઑપરેશન કરીને ગુનાખોરી ડામવા માટે મોટી કાર્યવાહી કરી હતી. પોલીસ દ્વારા સોમવારે રાત્રે ૧૧ વાગ્યાથી આ વિશેષ ઝુંબેશ ચલાવવામાં આવી હતી. મહાત્મા ફુલે ચોક પોલીસ-સ્ટેશનની હદમાં આવેલા રેલવે-સ્ટેશનના પરિસર, ST બસ-સ્ટૅન્ડ, ઝુંજારરાવ માર્કેટ, નીલમ ગલી તેમ જ વિવિધ હોટેલો અને લૉજમાં પોલીસે સઘન તપાસ કરી હતી. આ ઑપરેશન દરમ્યાન શંકાસ્પદ હિલચાલ અને નિયમોનું ઉલ્લંઘન કરનારાઓમાં ફફડાટ ફેલાઈ ગયો હતો.
આ ઑપરેશન દરમ્યાન પોલીસે જાહેર સ્થળોએ દારૂ પીતી અને શંકાસ્પદ જણાતી કુલ ૩૩ વ્યક્તિની અટકાયત કરી હતી અને તેમની સામે વિવિધ કલમો હેઠળ ગુનો દાખલ કરીને કાયદેસરની કાર્યવાહી કરી હતી. આ ઉપરાંત પોલીસે આ વિસ્તારની ૪ લૉજમાં પણ સરપ્રાઇઝ તપાસ કરી હતી જેથી કોઈ અસામાજિક તત્ત્વો ત્યાં છુપાયેલાં ન હોય. આ મહત્ત્વપૂર્ણ કામગીરીમાં મહાત્મા ફુલે ચોક પોલીસ-સ્ટેશનની સાથે ખડકપાડા અને બજારપેઠ પોલીસ-સ્ટેશનનો કાફલો પણ જોડાયો હતો. પોલીસના આ કડક વલણને કારણે સ્ટેશન વિસ્તારમાં ગેરકાયદે પ્રવૃત્તિ કરતાં તત્ત્વોમાં ભારે ફફડાટ જોવા મળી રહ્યો છે અને સ્થાનિક રહેવાસીએ સુરક્ષાના આ પગલાને આવકાર્યું છે.
