મુંબઈ-પુણે એક્સપ્રેસવેની ૧૩.૩ કિલોમીટર લાંબી મિસિંગ લિન્કનું પહેલી મેએ ઉદ્ઘાટન

વધારાના ટોલ વગર પહેલા ૬ મહિના માટે ફક્ત કાર અને બસોને આ રૂટ પર મંજૂરી

ફાઇલ તસવીર

મુંબઈ-પુણે એક્સપ્રેસવેના ૧૩.૩ કિલોમીટર લાંબા મિસિંગ લિન્ક સેક્શનનું ઉદ્ઘાટન પહેલી મે (મહારાષ્ટ્ર દિવસ)એ મુખ્ય પ્રધાન દેવેન્દ્ર ફડણવીસ દ્વારા કરવામાં આવશે એમ મહારાષ્ટ્ર સ્ટેટ રોડ ડેવલપમેન્ટ કૉર્પોરેશન (MSRDC)ના ઑફિસરોએ જણાવ્યું હતું. પહેલા ૬ મહિના માટે ફક્ત કાર અને બસોને આ માર્ગ પર મંજૂરી આપવામાં આવશે. એક વાર કાર્યરત થયા પછી બન્ને શહેરો વચ્ચેનો મુસાફરીનો સમય ઓછામાં ઓછો ૩૦ મિનિટ ઘટશે અને અંતર ૬ કિલોમીટર ઘટશે, જેમાં કોઈ વધારાનો ટોલ લાગશે નહીં.

ભારે વાહનો અને જોખમી મટીરિયલ ટ્રાન્સપોર્ટ કરતાં વાહનોને નવા માર્ગ પર મંજૂરી આપવામાં આવશે નહીં અને આ વાહનો હાલના ઘાટ વિભાગનો ઉપયોગ ચાલુ રાખશે. ચોમાસા પછી ટ્રાફિકનો સ્ટડી કરીને ગુડ્સ કૅરિયરને લિમિટેડ એન્ટ્રી આપવાનું વિચારી શકાય.