22 April, 2026 07:32 AM IST | Mumbai | Gujarati Mid-day Correspondent
પ્રતીકાત્મક તસવીર
જુહુમાં રહેતા એક વેપારીને ઊંચા વળતરની લાલચ આપીને કુલ ૩.૨૫ કરોડ રૂપિયાની છેતરપિંડી કરનાર એક આંતરરાજ્ય ગૅન્ગના ૯ લોકો સામે સોમવારે વિલે પાર્લે પોલીસે ફરિયાદ નોંધી છે જેમાં બે મહિલાઓનો પણ સમાવેશ છે. આરોપીઓ મુંબઈ ઉપરાંત ઓડિશા, બિહાર અને ઝારખંડના રહેવાસી હોવાનું જાણવા મળ્યું છે. આ ઘટનાની તપાસ મુંબઈ ક્રાઇમ બ્રાન્ચને સોંપવામાં આવી છે.
વિલે પાર્લે પોલીસ-સ્ટેશનના એક સિનિયર અધિકારીએ ‘મિડ-ડે’ને કહ્યું હતું કે ‘ફરિયાદી જુહુમાં ખાનગી વ્યવસાય ચલાવે છે. ફરિયાદી ૨૦૨૫ના જુલાઈ દરમ્યાન ૪ આરોપીઓના સંપર્કમાં આવ્યો હતો. આરોપીઓએ તેને બ્રોકર તરીકે ઓળખ આપીને ‘આર્કશિપ ગ્રુપ’ નામની કંપનીમાં રોકાણ કરવા પ્રોત્સાહિત કર્યો હતો અને ઊંચા નફાની ખાતરી આપી હતી. આ લાલચમાં આવીને વેપારીએ ૧ કરોડ રૂપિયા ઑનલાઇન ટ્રાન્સફર કર્યા હતા. જોકે બાદમાં જાણવા મળ્યું હતું કે એ રૂપિયા ‘માનવ ધર્મયોગ’ નામના NGOના ખાતામાં વાળવામાં આવ્યા હતા. આ સંદર્ભે વેપારીએ પ્રશ્ન પૂછતાં આરોપીઓએ તેને વિલે પાર્લેમાં વેસ્ટર્ન એક્સપ્રેસ હાઇવે નજીક આવેલી એક હોટેલમાં મળવા બોલાવ્યો હતો. ત્યાં વેપારી અને તેની કંપનીના જનરલ મૅનેજરની મારઝૂડ કરવામાં આવી હતી. એ પછી તેમને બંદૂક બતાવીને મારી નાખવાની ધમકી આપીને ૩ કરોડ રૂપિયાની માગણી કરી હતી. એ પછી પોતાને મારી નાખશે એવા ડરથી વેપારીએ તરત ૨.૨૫ કરોડ રૂપિયા ઑનલાઇન ટ્રાન્સફર કર્યા હતા. પૈસા મળ્યા બાદ આરોપીઓએ વેપારીને છોડી મૂક્યો હતો. પ્રાથમિક તપાસ મુજબ આ ગૅન્ગ મોટા આંતરરાજ્ય નેટવર્કનો ભાગ હોઈ શકે છે. આ કેસમાં વધુ તપાસ હાથ ધરવામાં આવી છે.’
