08 May, 2026 12:06 PM IST | Mumbai | Gujarati Mid-day Correspondent
પ્રતીકાત્મક તસવીર
મહાનગર ગૅસ લિમિટેડ (MGL)નું બાકી બિલ ન ભરવા બદલ કનેક્શન કાપી નાખવાની ધમકી આપીને ઘાટકોપર-ઈસ્ટના વલ્લભબાગ લેનમાં રહેતા ૭૨ વર્ષના ગુજરાતી નિવૃત્ત સિનિયર સિટિઝન પાસેથી સાઇબર ગઠિયાઓએ ૧૯,૭૪,૨૨૬ રૂપિયા પડાવી લીધા હોવાની ઘટના પ્રકાશમાં આવી છે. આ મામલે ઈસ્ટર્ન સાઇબર સેલે મંગળવારે ઘટનાની ફરિયાદ નોંધીને વધુ તપાસ શરૂ કરી છે. આ ઘટનામાં ફરિયાદી અને તેના પરિવારનાં બૅન્ક સાથેનાં લિન્ક્ડ ખાતાં સાઇબર ગઠિયાઓએ સાફ કરી દેતાં ગુજરાતી સિનિયર સિટિઝન તકલીફમાં મુકાયા હોવાની માહિતી પોલીસે આપી છે.
ઘાટકોપરમાં રહેતા સિનિયર સિટિઝનના મોબાઇલ પર પહેલી મેએ વૉટ્સઍપ મેસેજ આવ્યો હતો. એમાં ધમકી આપવામાં આવી હતી કે જો ગૅસનું બિલ ભરવામાં નહીં આવે તો રાત્રે ૧૦ વાગ્યે કનેક્શન કાપી નાખવામાં આવશે.
મેસેજમાં આપેલા નંબર પર સંપર્ક કરતાં શ્રીકાંત મિશ્રા નામના શખ્સે જણાવ્યું કે માત્ર ૧૨ રૂપિયાનું બિલ બાકી છે. પેમેન્ટ કરવા માટે ઠગ દ્વારા વૉટ્સઍપ પર એક લિન્ક મોકલવામાં
આવી હતી.
ફરિયાદીએ જ્યારે એ લિન્ક પર ક્લિક કરીને ડેબિટ કાર્ડથી પેમેન્ટ કરવાનો પ્રયાસ કર્યો ત્યારે પેમેન્ટ સફળ થયું નહોતું, પરંતુ એ લિન્ક દ્વારા ઠગોએ ફોનનો ઍક્સેસ મેળવી લીધો હતો. મોડી રાત્રે ફરિયાદી અને તેમના પરિવારના બે મેમ્બરોનાં લિન્ક્ડ ખાતાંમાંથી ૧૯,૭૪,૨૨૬ રૂપિયા ઉપાડી લેવામાં આવ્યા હતા.
શનિવારે બપોરે ફરિયાદી પોતાના મોબાઇલથી દૂધ માટેનું પેમેન્ટ કરવા ગયા તો એ થયું નહોતું. અંતે બૅન્કમાં તપાસ કરતાં આ ઘટના પ્રકાશમાં આવી હતી. આ ઘટનામાં ફરિયાદીનાં બન્ને બૅન્ક-ખાતાંમાંથી તમામ રૂપિયા ઉપાડી લેવામાં આવતાં ફરિયાદી મુસીબતમાં મુકાઈ ગયા છે. પોલીસે દાવો કર્યો હતો કે ફરિયાદીની જીવનભરની મૂડી સાઇબર ગઠિયા ચાંઉ કરી ગયા છે.
