ઍરપોર્ટ પર ૩૦-૩૧ ડિસેમ્બરે ૧૪ કરોડ રૂપિયાની દાણચોરી પકડાઈ

સોનું, ડાયમન્ડ અને ડ્રગ્સની હેરાફેરી કરતા મુસાફરો પકડાયા

પ્રતીકાત્મક તસવીર

છત્રપતિ શિવાજી મહારાજ ઇન્ટરનૅશનલ ઍરપોર્ટના કસ્ટમ ઑફિસરોએ ૩૦થી ૩૧ ડિસેમ્બર દરમ્યાન ગોલ્ડ, ડાયમન્ડ અને ડ્રગ્સની દાણચોરીના અનેક પ્રયાસ નિષ્ફળ બનાવ્યા હતા. ઍરપોર્ટ પરથી એક મુસાફર પાસેથી ૨.૫૨ કરોડ રૂપિયાની કિંમતના હીરા મળી આવ્યા હતા તેમ જ સોનાની દાણચોરીના અલગ-અલગ કેસો મળ્યા હતા જેમાં એક ઍરપોર્ટ સ્ટાફની મિલીભગત હોવાની આશંકા બતાવવામાં આવી છે. એક ટ્રાવેલર પાસેથી ૧૧.૩૫ લાખ રૂપિયાની કિંમતનાં સોનાનાં બટનો જપ્ત કર્યાં હતાં તો બીજા એક પ્રવાસી પાસેથી ૧.૮૭ કરોડ રૂપિયાનો ૧.૪૭ કિલો જેટલો સોનાનો ભૂકો જપ્ત કરવામાં આવ્યો હતો. બીજા બે કેસ મળીને ૨૦.૪૧ લાખ રૂપિયાનું સોનું જપ્ત કરવામાં આવ્યું હતું. બૅન્ગકૉકથી આવેલા એક મુસાફર પાસેથી અધિકારીઓએ ૮ કિલો ગાંજો જપ્ત કર્યો હતો જેની કિંમત ૮ કરોડ રૂપિયા હોવાનો અંદાજ છે. બીજા એક કેસમાં ૧.૯૪ કરોડ રૂપિયાના ૧.૯ કિલો ગાંજા સાથે એક મુસાફર પકડાયો હતો.