25 August, 2026 09:28 AM IST | Mumbai | Gujarati Mid-day Correspondent
પ્રતીકાત્મક તસવીર
બાંદરા-ઈસ્ટના કલાનગરમાં આવેલા ૨૯ માળના રેસિડેન્શિયલ બિલ્ડિંગમાં આઉટડોર ઍર-કન્ડિશન (AC) યુનિટનું ઇન્સ્ટૉલેશન કરતી વખતે ૨૭ વર્ષના એક ટેક્નિશિયને અગિયારમા માળથી નીચે પટકાતાં જીવ ગુમાવ્યો હતો. શનિવારે બપોરે આશરે ૧૨.૩૦ વાગ્યે ટેન BKC નામના બિલ્ડિંગમાં આ દુર્ઘટના બની હતી.
પોલીસના જણાવ્યા મુજબ ટેક્નિશિયન ACનું આઉટડોર યુનિટ લગાવી રહ્યો હતો ત્યારે તેણે હેલ્મેટ પહેરી નહોતી. પ્રાથમિક તપાસમાં સુરક્ષાના નિયમોનું પાલન પણ થયું ન હોવાનું સામે આવ્યું હતું. બેદરકારીને પગલે ખેરવાડી પોલીસે સુપરવાઇઝર અને AC કૉન્ટ્રૅક્ટર સામે કેસ નોંધીને બન્નેની અટકાયત કરી છે.
અટકાયત કરાયેલા બન્ને જણે પૂછપરછ દરમ્યાન એવો દાવો કર્યો હતો કે ટેક્નિશિયને સેફટી હાર્નેસ યોગ્ય રીતે પહેરી હતી કે નહીં એ વિશે તેમની પાસે કોઈ સ્પષ્ટ માહિતી નહોતી. પોલીસે ઘટનાસ્થળનું નિરીક્ષણ કરીને આગળની તપાસ શરૂ કરી છે.
