ચોરીમાં સેન્ચુરી કરનારા બે જણની ધરપકડ

વિરારના ગુજરાતી વેપારીના કારખાનાની છત તોડીને આરોપીઓએ વાસણો ચોર્યાં હતાં એ કેસની તપાસમાં પકડાયા

વિરાર પોલીસે બન્ને આરોપીઓની ધરપકડ કરી હતી.

વિરાર-ઈસ્ટમાં કિરણ ઇન્ડસ્ટ્રિયલ એસ્ટેટમાં ૬૭ વર્ષના સુરેશ શાહના સ્ટીલનાં વાસણોના કારખાનામાંથી ૨૦ નવેમ્બરે આશરે ૨૫,૦૦૦ રૂપિયાનાં વાસણોની ચોરીના કેસમાં વિરાર પોલીસે ૨૭ વર્ષના અજય શાહ અને ૨૮ વર્ષના શંકરની ધરપકડ કરી હતી. બન્ને આરોપીઓ સામે મુંબઈ, થાણે, નવી મુંબઈ તેમ જ વસઈ-વિરારમાં ૧૦૦થી વધારે ચોરીના ગુનાઓ નોંધાયા હોવાનું પ્રાથમિક માહિતીમાં સામે આવ્યું છે. પોલીસે અજયની અગાઉ ચોરીના ગુનામાં ધરપકડ કરી હતી. તેના જામીન તાજેતરમાં થતાં તેણે ફરી વાર ચોરી કરી હોવાનું પ્રાથમિક માહિતીમાં સામે આવ્યું છે.
વિરાર પોલીસ-સ્ટેશનના પોલીસ-ઇન્સ્પેક્ટર જ્ઞાનેશ ફડતરેએ ‘મિડ-ડે’ને કહ્યું હતું કે ‘વાસણોના કારખાનાની છત તોડીને આરોપીઓએ ચોરી કરી હતી. એ સમયે કારખાનાની આસપાસના વિસ્તારના CCTV કૅમેરાનાં ફુટેજ તપાસતાં આરોપીઓ કારમાં ચોરી કરવા આવ્યા હોવાની માહિતી પ્રાપ્ત થઈ હતી. એ કાર વિશે તપાસ કરતાં એ કાર એક દિવસ પહેલાં કલ્યાણમાંથી ચોરી કરવામાં આવી હતી અને એ જ કારમાંથી એક ચેઇન-સ્નૅચિંગ પણ કરવામાં આવ્યું હોવાની માહિતી મળી હતી. ત્યાર બાદ આરોપીની વધુ માહિતી કાઢીને મીરા રોડમાંથી બન્ને આરોપીની ધરપકડ કરવામાં આવી છે. અજય અને શંકર સાથે જ ચોરી કરતા હોવાનું પ્રકાશમાં આવ્યું હતું. બન્ને આરોપીઓ સામે ૧૦૦ કરતાં વધારે ગુના અલગ-અલગ પોલીસ-સ્ટેશનોમાં નોંધાયા હોવાની માહિતી સામે આવી છે.’