22 July, 2026 09:07 AM IST | Mumbai | Gujarati Mid-day Correspondent
બૉમ્બે હાઈ કોર્ટ
દોઢ વર્ષથી ગુમ થયેલા છોકરાને મુંબઈ પોલીસ શોધી ન શકતાં બૉમ્બે હાઈ કોર્ટે પોલીસને બરોબરની ખખડાવી હતી અને સાથે જ સવાલ કર્યો હતો કે કેમ તમે તે ખોવાયેલા છોકરાનો ફોટો મીડિયામાં સર્ક્યુલેટ ન કર્યો? એ પછી તે છોકરાને શોધી કાઢવા એક ખાસ અલાયદી ટીમ બનાવીને તેને શોધી કાઢવાનો આદેશ આપ્યો છે.
બૉમ્બે હાઈ કોર્ટના ઍક્ટિંગ જજ રવીન્દ્ર ઘુગે અને જસ્ટિસ ગૌતમ અણખડે ૨૦૨૫ની ૧૧ જાન્યુઆરીએ ગુમ થયેલા છોકરાના પિતા પ્યારેમિયાં કુરેશીએ દાખલ કરેલી અરજીની સુનાવણી કરી હતી. પ્યારેમિયાં કુરેશીએ તેની અરજીમાં કહ્યું હતું કે તેણે પોલીસ સાથે આ બાબતે ઘણી વાર ફૉલો-અપ કર્યું હતું, પણ એમાં કોઈ ખાસ પ્રોગ્રેસ જોવા મળ્યો નોહોતો.
આ બાબતે કોર્ટે મુંબઈ પોલીસને પૂછ્યું હતું કે શું તમે મિસિંગ છોકરાનો ફોટો મીડિયામાં પબ્લિશ કર્યો હતો? એના જવાબમાં પોલીસે ના પાડતાં કોર્ટ બગડી હતી અને કહ્યું હતું કે ‘શું આ મુંબઈ પોલીસ છે? તમે તમારી સરખામણી ઇન્ટરપોલ સાથે કરો છો. શું તમને એ પણ ખબર નથી કે મીડિયામાં ઍડ કઈ રીતે આપી શકાય?’
કોર્ટે છોકરાના પિતાને તેનો નવો ફોટો પોલીસને આપવા જણાવ્યું હતું અને પોલીસને કહ્યું હતું કે ‘આ લોકો ઉત્તર પ્રદેશના છે એટલે અહીંનાં અને ઉત્તર પ્રદેશનાં છાપાંમાં પણ મિસિંગ છોકરાનો ફોટો છપાવો જેથી તેની ભાળ મળી શકે.’
કોર્ટે અરજીની હવે પછીની સુનાવણી આવતા અઠવાડિયામાં રાખી છે.
