આ તો હજી ટ્રેલર છે, પિક્ચર હજી બાકી છે

આમ કહીને ચાલુ કોર્ટે મર્ડરના આરોપીએ સરકારી વકીલની મારઝૂડ કરીને જાનથી મારવાની ધમકી આપી

પ્રતીકાત્મક તસવીર

કલ્યાણ રેલવે સ્ટેશન નજીક આવેલી સિટી સિવિલ કોર્ટમાં ગઈ કાલે મર્ડરના અન્ડર-ટ્રાયલ આરોપીએ ચાલુ કોર્ટમાં સરકારી વકીલની મારઝૂડ કરીને તેને જાનથી મારવાની ધમકી આપી હતી. ત્યાર બાદ તે વકીલે કલ્યાણના મહાત્મા ફુલે પોલીસ સ્ટેશનમાં આરોપી વિરુદ્ધ ફરિયાદ નોંધાવી હતી

ગઈ કાલે બપોરે સિટી સિવિલ કોર્ટમાં મર્ડરના અન્ડર-ટ્રાયલ આરોપી આકાશ તાવડેના કેસ પર ટ્રાયલ ચાલી રહી હતી ત્યારે સરકારી વકીલે પોતાની બાજુ કોર્ટને કહી હતી. એથી રોષે ભરાઈને આકાશે કઠેડામાંથી બહાર આવીને વકીલની મારઝૂડ શરૂ કરી દીધી હતી. ત્યાં ઊભેલા પોલીસ અધિકારીઓએ આકાશને અટકાવ્યો હતો. એ પછી પણ આકાશે વકીલને ધમકી આપીને કહ્યું હતું કે ‘તને જાનથી મારી દઈશ. આ તો હજી ટ્રેલર છે, પિક્ચર હજી બાકી છે.’

મહાત્મા ફુલે પોલીસ સ્ટેશનના એક અધિકારીએ ‘મિડ-ડે’ને કહ્યું હતું કે ‘આરોપી હાલમાં આધારવાડી જેલમાં સજા કાપી રહ્યો છે. તેની સામે મારઝૂડ કરવાની અને અપશબ્દો બોલવાની ફરિયાદ નોંધીને તપાસ કરવામાં આવી રહી છે.’