પ્રાઈવેટ પાર્ટને સ્પર્શવું પણ બળાત્કાર, સગીર પીડિતાનું નિવેદન પૂરતું- હાઇ કોર્ટ

બૉમ્બે હાઈકોર્ટની નાગપુર બેન્ચે ચુકાદો આપ્યો છે કે અયોગ્ય ઈરાદાથી ગુપ્તાંગને સ્પર્શ કરવો પણ બળાત્કાર ગણાય. કોર્ટે પોક્સો કેસમાં આરોપીની સજાને યથાવત રાખી છે.

પ્રતીકાત્મક તસવીર

બૉમ્બે હાઈકોર્ટની (Bombay High Court) નાગપુર બેન્ચે ચુકાદો આપ્યો છે કે અયોગ્ય ઈરાદાથી ગુપ્તાંગને સ્પર્શ કરવો પણ બળાત્કાર ગણાય. કોર્ટે પોક્સો કેસમાં આરોપીની સજાને યથાવત રાખી છે.

બૉમ્બે હાઈકોર્ટની નાગપુર બેન્ચે જણાવ્યું છે કે બાળકો સાથે થોડું પણ અભદ્ર વર્તન પણ બળાત્કાર ગણવો જોઈએ. ૩૮ વર્ષીય આરોપીની અરજીને ફગાવી દેતા કોર્ટે કહ્યું કે તેણે ૫ અને ૬ વર્ષની છોકરીઓ સાથે અભદ્ર કૃત્ય કર્યું છે, જેના કારણે પોક્સો કેસ બને છે. કોર્ટે આરોપીની ૧૦ વર્ષની સજાને યથાવત રાખી છે.

આરોપી વ્યવસાયે ડ્રાઈવર છે અને વર્ધા જિલ્લાના હિંગણઘાટનો રહેવાસી છે. ચુકાદો આપતાં ન્યાયાધીશ નિવેદિતા મહેતાએ જણાવ્યું હતું કે પીડિતાને જાતીય ઈરાદાથી સ્પર્શ કરવો અથવા તેની સાથે જાતીય સંબંધ બાંધવાનો પ્રયાસ કરવો એ બળાત્કાર ગણાય છે.

અહેવાલો અનુસાર, આરોપીએ છોકરીઓને જામફળથી લલચાવી હતી અને પછી તેમને અશ્લીલ વીડિયો બતાવ્યા હતા. તેણે તેમના પર જાતીય હુમલો કરવાનો પ્રયાસ કર્યો હતો. આરોપી વિરુદ્ધ POCSO એક્ટ અને ભારતીય દંડ સંહિતાની કલમ 376 (2) (i) અને 511 હેઠળ કેસ નોંધવામાં આવ્યો હતો. નીચલી કોર્ટે આરોપી પર ₹50,000 નો દંડ પણ ફટકાર્યો હતો.

ન્યાયાધીશ મહેતાએ જણાવ્યું હતું કે પીડિતાઓ અને તેમની માતાના નિવેદનો, ફોરેન્સિક પુરાવાઓ સાથે, સૂચવે છે કે તેમના પર જાતીય હુમલો કરવાનો પ્રયાસ કરવામાં આવ્યો હતો. તેમણે ઉમેર્યું હતું કે ઘટનાના 15 દિવસ પછી કરવામાં આવેલી તબીબી તપાસમાં પીડિતાના ગુપ્તાંગ પર કોઈ ઈજાના નિશાન જોવા મળ્યા નથી. આનો અર્થ એ નથી કે આરોપીએ તેના પર જાતીય હુમલો કર્યો ન હતો. આરોપીએ પોતાની અરજીમાં જણાવ્યું હતું કે તેના પરના આરોપો પીડિતાના પરિવાર સાથે લાંબા સમયથી ચાલતા દુશ્મનાવટ પર આધારિત હતા.

ન્યાયાધીશ મહેતાએ જણાવ્યું હતું કે સજા ઘટના સમયે POCSO એક્ટની જોગવાઈઓ અનુસાર હોવી જોઈએ. ઓગસ્ટ 2019 માં કાયદામાં સુધારા બાદ, ઓછામાં ઓછી 20 વર્ષની સજા ફટકારવામાં આવી હતી. બેન્ચે તારણ કાઢ્યું હતું કે આરોપી માટે 10 વર્ષની સખત કેદ પૂરતી છે.

ઉલ્લેખનીય છે કે, આ પહેલા સગીરા પર બળાત્કાર કરનાર ૨૯ વર્ષના આરોપીએ તેની સાથે જ લગ્ન કરી લીધાં હોવાથી તેની સામેનો ફર્સ્ટ ઇન્ફર્મેશન રિપોર્ટ (FIR) રદ કરવાની માગણી કરી હતી એ  બૉમ્બે હાઈ કોર્ટની નાગપુર બેન્ચે ફગાવી દીધી હતી. કોર્ટે કહ્યું હતું કે પીડિતા સાથે લગ્ન કરી લેવાથી આરોપીને બળાત્કારના ગુનામાંથી અને એ પણ સગીરા પર કર્યો હોવાથી પ્રોટેક્શન ઑફ ચિલ્ડ્રન ફ્રૉમ સેક્સ્યુઅલ ઑફેન્સિસ (POCSO) ઍક્ટ હેઠળ નોંધાયેલા ગુનામાંથી મુક્તિ ન મળી શકે.