ટિટવાલામાં રમતાં-રમતાં પાણી ભરેલા ટબમાં પડી જતાં બે વર્ષના બાળકનું મૃત્યુ

દુર્ઘટના રવિવારે રાત્રે બની હતી. મૃત્યુ પામેલા બાળકની ઓળખ યુવાંશ યાદવ તરીકે કરવામાં આવી છે.

પ્રતીકાત્મક તસવીર

ટિટવાલા વિસ્તારમાં એક અત્યંત હૃદયદ્રાવક ઘટના સામે આવી છે. અહીં પોતાના ઘરમાં રમી રહેલો બે વર્ષનો માસૂમ બાળક અકસ્માતે પાણીથી ભરેલા ટબમાં પડી જતાં તેનું કરુણ મૃત્યુ થયું હતું. ટિટવાલા પોલીસે આપેલી માહિતી અનુસાર આ દુર્ઘટના રવિવારે રાત્રે બની હતી. મૃત્યુ પામેલા બાળકની ઓળખ યુવાંશ યાદવ તરીકે કરવામાં આવી છે. રવિવારે રાત્રિના સમયે યુવાંશનાં માતા-પિતા ઘરમાં રાતનું ભોજન કરી રહ્યાં હતાં ત્યારે માસૂમ બાળક ઘરની અંદર રમી રહ્યો હતો. રમતાં-રમતાં તે ઘરના બાથરૂમમાં જતો રહ્યો હતો જ્યાં પાણીથી ભરેલું ટબ રાખેલું હતું. અચાનક સંતુલન ગુમાવતાં બાળક ઊંડા ટબમાં પડી ગયો હતો. થોડી વાર પછી જ્યારે માતા-પિતા તેને શોધવા માટે બાથરૂમમાં ગયાં ત્યારે બાળક પાણીથી ભરેલા ટબમાં બેભાન અવસ્થામાં મળી આવ્યો હતો.

માતા-પિતાએ તાત્કાલિક બાળકને બહાર કાઢીને ઇલાજ માટે ટિટવાલાની એક ખાનગી હૉસ્પિટલમાં ખસેડ્યો હતો. જોકે બાળકની ગંભીર હાલતને જોતાં તેને વધુ સારવાર માટે કલ્યાણની સેન્ટ્રલ હૉસ્પિટલમાં ખસેડવામાં આવ્યો હતો જ્યાં ડૉક્ટરોએ તેને મૃત જાહેર કર્યો હતો. આ વિશે ટિટવાલા પોલીસે ADR નોંધ્યો છે અને ઘટનાના સંદર્ભમાં આગળની કાનૂની તપાસ હાથ ધરી છે.