27 September, 2026 03:41 PM IST | Mumbaibu | Gujarati Mid-day Online Correspondent
પ્રતીકાત્મક ફાઇલ તસવીર
મુંબઈના ગોરેગાંવ પૂર્વના રામ મંદિર વિસ્તારમાં આવેલા એક જાહેર શૌચાલયમાં તીવ્ર રાસાયણિક વાયુ (ફ્યુમ્સ) શ્વાસમાં લેવાથી બે યુવકોના મોત થયા હોવાનો દાવો કરવામાં આવ્યો છે. આ ઘટના મૃણાલતાઈ બ્રિજ પાસે, પારસી પંચાયત ગેટની સામે બની હતી. મૃતકોની ઓળખ ૨૪ વર્ષીય પ્રભાકર ધનિવર અને ૧૮ વર્ષીય ભાવિન દેસાઈ તરીકે કરવામાં આવી છે.
અહેવાલો અનુસાર, બન્ને યુવકો ૨૭ સપ્ટેમ્બરના રોજ મધ્યરાતે શૌચાલયની અંદરથી મળી આવ્યા હતા. અંદર, તીવ્ર રાસાયણિક ગંધને કારણે તેમને શ્વાસ લેવામાં તકલીફ પડી અને તેઓ બેભાન થઈને ઢળી પડ્યા. ઘટનાની જાણ થતાં પોલીસ ઘટનાસ્થળે પહોંચી હતી. બન્નેને બેભાન અવસ્થામાં તાત્કાલિક ટ્રોમા કૅર હૉસ્પિટલમાં લઈ જવામાં આવ્યા હતા. ડૉક્ટરોએ સારવાર શરૂ કરી હતી, પરંતુ તે દરમિયાન બન્ને યુવકોના મોત થયા હતા. સવારે ૩:૪૯ વાગ્યે તેમને મૃત જાહેર કરવામાં આવ્યા હતા.
વરિષ્ઠ પોલીસ નિરીક્ષક અબ્દુલ શેખે જણાવ્યું હતું કે, "રામ મંદિર વિસ્તારમાં `શિવશંકર ચાલ` આવેલી છે, જ્યાં બાથરૂમ અને પબ્લિક શૌચાલયની સુવિધા છે. ગણેશોત્સવ મંડળના આઠથી નવ સ્વયંસેવકો ભોજન કરવા ગયા હતા. જમ્યા પછી, તેઓ પાછા ફર્યા અને સાથે બેઠા હતા. ત્યારબાદ, ભાવિન અને પ્રભાકર શૌચાલયમાં ગયા. અંદર તેમને ચક્કર આવ્યા અને તેઓ ઢળી પડ્યા. જ્યારે તેઓ લગભગ અડધા કલાક પછી પણ બહાર ન આવ્યા, ત્યારે અન્ય લોકો તપાસ કરવા ગયા. દરવાજો અંદરથી બંધ હતો. બન્ને યુવકોને બહાર કાઢવા માટે તેમણે દરવાજો તોડવો પડ્યો હતો."
પોલીસના જણાવ્યા અનુસાર, શૌચાલયની નજીક ઘરગુતી કારખાનું છે જ્યાં અમુક રસાયણોનો ઉપયોગ થાય છે. પ્રાથમિક માહિતી સૂચવે છે કે વર્કશૉપમાંથી રસાયણો ડ્રેનેજ સિસ્ટમમાં છોડવામાં આવી રહ્યા હતા. શૌચાલય અને ડ્રેનેજ લાઈનો એકબીજાની નજીકથી પસાર થાય છે. આમાં સામેલ રસાયણ અત્યંત ઝેરી હોવાનું કહેવાય છે. ઘટના બાદ મુંબઈ ફાયર બ્રિગેડ, પોલીસ, ૧૦૮ એમ્બ્યુલન્સ સેવા, મહારાષ્ટ્ર પ્રદૂષણ નિયંત્રણ બોર્ડ અને બીએમસી (BMC) ના કર્મચારીઓ ઘટનાસ્થળે પહોંચ્યા હતા. પ્રાથમિક તપાસમાં જાણવા મળ્યું છે કે મૃત્યુ ગૂંગળામણને કારણે થયું હતું. અબ્દુલ શેખે જણાવ્યું હતું કે, "હાલમાં કૅમેરાના ફૂટેજની તપાસ સાથે પોસ્ટમોર્ટમની પ્રક્રિયા ચાલી રહી છે. કાયદાકીય કાર્યવાહી ચાલી રહી છે અને સંબંધિત વ્યક્તિ સામે કેસ નોંધવામાં આવશે." આ ઘટના બાદ સમગ્ર પરિસર અને શૌચાલયને સીલ કરી દેવામાં આવ્યું છે. પોલીસ તપાસ કરી રહી છે કે તે રસાયણ શૌચાલય સુધી કેવી રીતે પહોંચ્યું અને તેમાં કોઈ બેદરકારી હતી કે નહીં?
