20 June, 2026 12:20 PM IST | Navi Mumbai | Gujarati Mid-day Correspondent
તસવીર સૌજન્યઃ સોશ્યલ મીડિયા
નવી મુંબઈ ઇન્ટરનૅશનલ ઍરપોર્ટની છતમાંથી પાણી લીક થતું હોવાનો દાવો કરતો એક વિડિયો વાઇરલ થયો હતો. એમ પણ કરોડો રૂપિયાના ખર્ચે બનેલા આ ઍરપોર્ટની મુંબઈ સાથે કનેક્ટિવિટીથી લોકો વધારે ખુશ નથી જણાઈ રહ્યા ત્યારે ઉદ્ઘાટનના અમુક મહિનામાં જ છતમાંથી પાણી ટપકતું જોઈને લોકોએ ૧૯,૬૫૦ કરોડ રૂપિયા એળે ગયા હોવાની પ્રતિક્રિયા આપી હતી.
જોકે નવી મુંબઈ ઇન્ટરનૅશનલ ઍરપોર્ટ દ્વારા આ અંગે તાત્કાલિક સ્પષ્ટતા આપવામાં આવી હતી. નિવેદનમાં જણાવાયું હતું કે ટર્મિનલ બિલ્ડિંગની અંદર બૅગેજ બેલ્ટ પાંચ અને છની નજીક છતમાંથી પાણી ટપકતું દેખાય છે એ કોઈ ઇન્ફ્રાસ્ટ્રકચરની ખામી નહીં પણ ઍર-કન્ડિશનર (AC)ના ડક્ટમાંથી લીક થતું પાણી છે જેને ૩૦ મિનિટમાં રિપેર કરવામાં આવ્યું હતું. ૧૭ જૂને બપોરે આ બનાવ બન્યો હતો, જેને કારણે બૅગેજ બેલ્ટ પાંચ અને ૬ બંધ કરવામાં આવ્યા હતા, જેને ૧૮ જૂનથી ફરી કાર્યરત કરવામાં આવ્યા છે.
