કૅન્સરની સારવાર માટે ભારત આવી રહેલી ૧૩ વર્ષની બાળકીનું ફ્લાઇટમાં મોત

ઇથિયોપિયન ઍરલાઇન્સના વિમાનમાં ટ્રાન્ઝિટ દરમ્યાન બાળકીએ દમ તોડ્યો

પ્રતીકાત્મક તસવીર

હૈદરાબાદમાં કૅન્સરની સારવાર કરાવવા માટે ભારત આવી રહેલી ઇથિયોપિયાની ૧૩ વર્ષની એક માસૂમ બાળકીનું ચાલુ ફ્લાઇટમાં જ કરુણ મોત નીપજ્યું છે. પોલીસના જણાવ્યા અનુસાર આ બાળકી છેલ્લાં ત્રણ વર્ષથી કૅન્સર સામે જંગ લડી રહી હતી. શનિવારે રાત્રે આશરે ૧ વાગ્યે ઇથિયોપિયન ઍરલાઇન્સનું વિમાન રાજીવ ગાંધી ઇન્ટરનૅશનલ ઍરપોર્ટ પર લૅન્ડ થયું એ પહેલાં જ અધવચ્ચે ટ્રાન્ઝિટ દરમ્યાન તેણે અંતિમ શ્વાસ લીધા હતા. પ્લેન લૅન્ડ થતાં જ તેને તાત્કાલિક ઍરપોર્ટની મેડિકલ ફેસિલિટીમાં ખસેડાઈ હતી, જ્યાં ડૉક્ટરોએ તેને મૃત જાહેર કરી હતી.

ટેક-ઑફ પહેલાં પ્રવાસીનું મોત

આવી જ અન્ય એક તબીબી કટોકટીની ઘટનામાં અબુ ધાબીથી બૅન્ગલોર આવી રહેલી ફ્લાઇટમાં ટેક-ઑફ પહેલાં કેરલમના ૫૧ વર્ષના પ્રવાસી યુસુફ કુન્હામ્મુનું મોત નીપજ્યું હતું. વિમાન ઊપડે એ પહેલાં જ તેમને શ્વાસ લેવામાં ગંભીર તકલીફ થઈ હતી. કૅબિન ક્રૂએ તાત્કાલિક પેરામેડિક્સની મદદ બોલાવી તેમને હૉસ્પિટલ ખસેડ્યા હતા, પરંતુ હૉસ્પિટલ પહોંચતાં જ ડૉક્ટરોએ તેમને મૃત જાહેર કર્યા હતા.