એક હાથમાં રસ્સી અને બીજા હાથમાં વાસણ લઈને ૩૦ ફુટ ઊંડે ઊતરવું પડે છે બાળકોને

આ ગામમાં ૪૨ ડિગ્રી તાપમાન છે ત્યારે તરસ બુઝાવવા માટે બાળકો દોરડું બાંધીને એના સહારે સાંકળી ગેમ રમતાં હોય એમ ઘડામાં પાણી ભરે છે.

વાઇરલ વિડીયોમાંથી સ્ક્રીનશૉટ

મધ્ય પ્રદેશમાં એક તરફ ભીષણ ગરમી છે અને બીજી તરફ કેટલાંક ગામો પાણીની તંગીની સમસ્યાથી ટળવળી રહ્યાં છે. બુરહાનપુરથી ૪૦ કિલોમીટર દૂર આવેલા ધૂલકોટ નામના આદિવાસી વિસ્તારમાં પચાસથી વધુ પરિવારો એક જ કૂવાના પાણી પર નિર્ભર છે. આ કૂવો પણ એટલો ઊંડો અને છીછરો થઈ ગયો છે કે એમાંથી પાણી કાઢવું પણ મુશ્કેલ છે. કૂવાને આડેધડ ખોદવામાં આવ્યો હોવાથી એની આસપાસ સેફ્ટી પણ નથી. પથરાળ કૂવામાંથી નાનાં-નાનાં વાસણોથી ઉલેચીને ઘડો ભરી શકાય છે. આ ગામમાં ૪૨ ડિગ્રી તાપમાન છે ત્યારે તરસ બુઝાવવા માટે બાળકો દોરડું બાંધીને એના સહારે સાંકળી ગેમ રમતાં હોય એમ ઘડામાં પાણી ભરે છે.

બાળકો આ રીતે જીવ જોખમમાં મૂકી રહ્યાં હોવાનો વિડિયો વાઇરલ થતાં બુરહાનપુરના કલેક્ટર હર્ષ સિંહે તાત્કાલિક ધોરણે આ ગામના લોકોની પીવાના પાણીની સમસ્યાનું નિવારણ કરવા અને તેમનાં ઘરો સુધી ટૅન્કર પહોંચાડવાની જાહેરાત કરી છે.