24 July, 2026 02:38 PM IST | Mumbai | Gujarati Mid-day Online Correspondent
પ્રતીકાત્મક ફાઇલ તસવીર
દિલ્હી પોલીસે ગુરુવારે દાવો કર્યો હતો કે તેઓએ 480 થી વધુ પાકિસ્તાન સ્થિત સોશિયલ મીડિયા એકાઉન્ટ્સ ઓળખી કાઢ્યા છે જેઓ નવી દિલ્હીમાં ચાલી રહેલા વિરોધ અંગે ખોટી માહિતી પોસ્ટ કરી રહ્યા છે. પોલીસે જણાવ્યું છે કે આ એકાઉન્ટ્સ જંતર-મંતર પર ચાલી રહેલા `કૉકરોચ જનતા પાર્ટી` (CJP) ના વિરોધ દરમિયાન અફવાઓ, નકલી પોસ્ટ્સ અને એડિટેડ વીડિયોઝ પોસ્ટ કરી રહ્યા છે. દિલ્હી પોલીસના એક અધિકારીએ સોશિયલ મીડિયા પર જણાવ્યું હતું કે આ એકાઉન્ટ્સ લોકો, ખાસ કરીને વિદ્યાર્થીઓને ઉશ્કેરવાનો પ્રયાસ કરી રહ્યા છે.
અધિકારીએ કહ્યું, "અમે વિવિધ સોશિયલ મીડિયા પ્લેટફોર્મ પર ખોટી માહિતીની પોસ્ટ જોઈ છે. અત્યાર સુધીમાં, અમે 480 થી વધુ પાકિસ્તાની સોશિયલ મીડિયા એકાઉન્ટ્સ ઓળખી કાઢ્યા છે જે વર્તમાન પરિસ્થિતિનો ઉપયોગ અફવાઓ ફેલાવવા માટે કરી રહ્યા છે. અમે આ એકાઉન્ટ્સને બ્લૉક કરી રહ્યા છીએ. `ઑપરેશન સિંદૂર` દરમિયાન પણ આ જ એકાઉન્ટ્સ સક્રિય હતા." તેમણે ઉમેર્યું હતું કે આ એકાઉન્ટ્સનો મુખ્ય ઉદ્દેશ્ય ખોટી માહિતી ફેલાવવાનો અને જનતા, ખાસ કરીને વિદ્યાર્થીઓને ઉશ્કેરવાનો છે.
દિલ્હી પોલીસે વિદ્યાર્થીઓને નકલી પોસ્ટ અને એડિટેડ વીડિયોઝથી સાવધ રહેવા વિનંતી કરી છે. અધિકારીએ જણાવ્યું હતું કે, "અમે વિદ્યાર્થીઓને અપીલ કરીએ છીએ કે, તેમની પોતાની સલામતી માટે, નકલી પોસ્ટ, એડિટેડ વીડિયોઝ અને અજાણ્યા સોશિયલ મીડિયા હેન્ડલ્સ દ્વારા શૅર કરવામાં આવતી માહિતી પર આધાર ન રાખે અથવા તેનાથી પ્રભાવિત ન થાય."
દિલ્હી પોલીસે લોકોને કોઈપણ પોસ્ટ શૅર કરતા પહેલા તેની સત્યતા ચકાસવાની સલાહ આપી હતી. અધિકારીએ કહ્યું હતું કે, "કોઈપણ પોસ્ટ શૅર કરતા પહેલા હકીકતો ચકાસો. અફવાઓ ફેલાવશો નહીં, અને અસામાજિક તત્વોને તમારી લાગણીઓનો ઉપયોગ કરવા દો નહીં." તેમણે એમ પણ ઉલ્લેખ કર્યો હતો કે દિલ્હી પોલીસ શાંતિપૂર્ણ વિરોધના અધિકારનું સન્માન કરે છે. અધિકારીએ કહ્યું હતું કે, "શાંતિપૂર્ણ વિરોધ એ તમારો અધિકાર છે, અને દિલ્હી પોલીસ આ અધિકારનું સન્માન કરે છે." દિલ્હી પોલીસે જનતાને શાંતિ જાળવવા અને કાયદો અને વ્યવસ્થા જાળવવામાં પોલીસને સહયોગ કરવાની પણ અપીલ કરી હતી.
CJI સૂર્યકાંતે CJP (કોકરોચ જનતા પાર્ટી) વિરોધ પ્રદર્શન સામે પોલીસ કાર્યવાહીનો આરોપ લગાવતી અરજીને ફગાવી દેતા મીડિયા અહેવાલોને ભ્રામક ગણાવ્યા છે. તેમણે સ્પષ્ટતા કરી કે સુપ્રીમ કોર્ટમાં આવી કોઈ અરજી દાખલ કરવામાં આવી નથી. ભારતના મુખ્ય ન્યાયાધીશ (CJI) સૂર્યકાંતે તાજેતરના મીડિયા અહેવાલોને સખત રીતે નકારી કાઢ્યા છે જેમાં દાવો કરવામાં આવ્યો છે કે સુપ્રીમ કોર્ટે કોકરોચ જનતા પાર્ટી (CJP) ના વિરોધીઓ સામે પોલીસ બર્બરતાના કેસની સુનાવણી કરવાનો ઇનકાર કર્યો હતો. CJI એ આવા મીડિયા રિપોર્ટિંગને ભ્રામક અને "બેદરકાર" ગણાવ્યા.
