05 November, 2026 07:23 AM IST | Mumbai | Gujarati Mid-day Correspondent
ગઈ કાલે દિલ્હીમાં લાજપત નગર સેન્ટ્રલ માર્કેટમાં ઊમટેલી શૉપિંગ કરનારા લોકોની ભીડ.
દિવાળીનો તહેવાર ભારતીય અર્થતંત્રના વિકાસ માટે એક શક્તિશાળી એન્જિન સાબિત થઈ રહ્યો છે. દેશનાં ૭૦ શહેરોમાં કરવામાં આવેલા આકલન અનુસાર ૨૦૨૬માં નવરાત્રિથી લઈને દિવાળી સુધીના તહેવારોના ગાળામાં વેપાર ૭ લાખ કરોડ રૂપિયાનો આંકડો વટાવી જવાનો અંદાજ છે. આ આંકડો ગયા વર્ષના ૬.૦૫ લાખ કરોડ રૂપિયાના વેપાર સામે ૧૫થી ૧૮ ટકાનો નોંધપાત્ર ઉછાળો દર્શાવે છે. એકલા દિલ્હીમાં જ આ તહેવારો દરમ્યાન અંદાજે ૧ લાખ કરોડ રૂપિયાનો વેપાર થવાની ધારણા છે.
કન્ફેડરેશન ઑફ ઑલ ઇન્ડિયા ટ્રેડર્સ (CAIT)ના સેક્રેટરી જનરલ અને ચાંદની ચૌકના સંસદસભ્ય પ્રવીણ ખંડેલવાલે આ વિગતો જાહેર કરતાં જણાવ્યું હતું કે રીટેલ, જ્વેલરી, ઇલેક્ટ્રૉનિક્સ, કાપડ, લૉજિસ્ટિક્સ અને હૉસ્પિટલિટી ક્ષેત્રે આવેલી આ તેજી લાખો લોકો માટે રોજગારી અને નવી તકો ઊભી કરી રહી છે. તેમણે ઉમેર્યું હતું કે દેશના ૯ કરોડથી વધુ વેપારીઓ આ તહેવારી આર્થિક ગતિવિધિનું મુખ્ય કેન્દ્રબિંદુ છે. તહેવારોની આ મોસમમાં ‘વોકલ ફૉર લોકલ’, ‘મેક ઇન ઇન્ડિયા’ અને ‘આત્મનિર્ભર ભારત’ના સંકલ્પને અપનાવીને ભારતીય ઉદ્યોગ-સાહસિકતાને પ્રોત્સાહન આપવા વિશે તેમણે આહ્વાન કર્યું હતું.
