24 September, 2026 03:24 PM IST | Leh | Gujarati Mid-day Online Correspondent
CJP અને સોનમ વાંગચુક
સામાજિક કાર્યકર સોનમ વાંગચુક લદ્દાખના મુદ્દે ફરી એકવાર ચર્ચામાં આવ્યા છે. તેમણે લદ્દાખ માટે પૂર્ણ રાજ્યનો દરજ્જો અને `છઠ્ઠી અનુસૂચિ` (Sixth Schedule) હેઠળ બંધારણીય સુરક્ષાની માગણી સાથે લેહમાં પદયાત્રા શરૂ કરી છે. જોકે, તેમાં `કૉકરોચ જનતા પાર્ટી` (CJP) ના મુખ્ય નેતાઓ આ યાત્રામાં જોડાયા ન હતા. CJP ના નેતાઓ અભિજીત દીપકે, સૌરભ દાસ અને આશુતોષ રંકાએ અગાઉ વાંગચુકના અભિયાનને સમર્થન આપ્યું હતું અને સોશિયલ મીડિયા પર લદ્દાખની તરફેણમાં પોતાના વિચારો વ્યક્ત કર્યા હતા. તેમ છતાં, આમાંથી કોઈ પણ નેતા યાત્રામાં ભાગ લેવા માટે લદ્દાખ ગયા ન હતા, જેથી વિવિધ અટકળો અને ટીકાઓ શરૂ થઈ છે.
ભૂતકાળમાં લદ્દાખ માટે પૂર્ણ રાજ્યનો દરજ્જો અને છઠ્ઠી અનુસૂચિ હેઠળ સુરક્ષાની માગણી કરતા આંદોલનો થયા છે. ૨૪ સપ્ટેમ્બર, ૨૦૨૫ના રોજ કેન્દ્રશાસિત પ્રદેશમાં હિંસા ફાટી નીકળી હતી. તેમાં ચાર લોકોના મોત થયા હતા. સોનમ વાંગચુકે આ ઘટનાની પ્રથમ વર્ષગાંઠ નિમિત્તે લેહમાં એક પ્રતીકાત્મક યાત્રા યોજી હતી. તેમણે શરૂઆતમાં ૧૯ થી ૨૪ સપ્ટેમ્બર દરમિયાન યાત્રાની જાહેરાત કરી હતી અને લોકોને તેમાં જોડાવા માટે અપીલ કરતો એક વીડિયો પણ જાહેર કર્યો હતો. જોકે, ખરાબ હવામાનને કારણે ચાર દિવસીય યાત્રા મુલતવી રાખવામાં આવી હતી. ત્યારબાદ, ૨૩ સપ્ટેમ્બર માટે એક દિવસીય યાત્રાની જાહેરાત કરવામાં આવી હતી. બુધવારે, વાંગચુક કેટલાક સ્થાનિક નાગરિકો અને લદ્દાખની બહારથી આવેલા મુલાકાતીઓ સાથે લેહ તરફ આગળ વધ્યા હતા. નોંધનીય છે કે, CJP ના મુખ્ય નેતાઓ અભિજીત દીપકે, સૌરભ દાસ અને આશુતોષ રંકા ત્યાં હાજર ન હતા જેથી તેમની સામે સવાલ થઈ રહ્યા છે.
દરમિયાન, લદ્દાખના લૅફ્ટનન્ટ ગવર્નર વિનય કુમાર સક્સેનાએ ૨૪ સપ્ટેમ્બર, ૨૦૨૫ના રોજ લેહમાં થયેલી હિંસામાં સામેલ ૨૦ વ્યક્તિઓ સામે નોંધાયેલા ફોજદારી કેસ પાછા ખેંચવાની જાહેરાત કરી હતી. સક્સેનાએ `X` પર લખ્યું, "લદ્દાખમાં શાંતિ અને સામાજિક સૌહાર્દના વ્યાપક હિતને ધ્યાનમાં રાખીને, મેં ગયા વર્ષે ૨૪ સપ્ટેમ્બરે લેહમાં થયેલી દુર્ભાગ્યપૂર્ણ હિંસાના સંબંધમાં ૨૦ વ્યક્તિઓ સામે નોંધાયેલા ફોજદારી કેસ પાછા ખેંચવાની મંજૂરી આપી છે." તેમણે જણાવ્યું હતું કે, વ્યાપક સમીક્ષા બાદ, લદ્દાખ પોલીસે લેહ પોલીસ સ્ટેશનમાં નોંધાયેલી FIR નંબર ૧૪૪/૨૦૦૫ માં નામિત ૨૦ વ્યક્તિઓ સામેના કેસ પડતા મૂકવાની ભલામણ કરી હતી. લદ્દાખમાં ચાલી રહેલા આંદોલનમાં રાજ્યનો દરજ્જો અને `છઠ્ઠી અનુસૂચિ` હેઠળ બંધારણીય સુરક્ષાની માગણીઓ લાંબા સમયથી મુખ્ય મુદ્દાઓ રહ્યા છે. વાંગચુકની તાજેતરની પદયાત્રા આ માગણીઓના સંદર્ભમાં અને ગયા વર્ષે થયેલી હિંસાની વર્ષગાંઠ નિમિત્તે યોજવામાં આવી હતી.
