લેફ્ટનન્ટ જનરલ ધીરજ સેઠ નવા આર્મી ચીફ, ૩૦ જૂનથી સંભાળશે પદભાર

લેફ્ટનન્ટ જનરલ ધીરજ સેઠને ગઈ કાલે આગામી ચીફ ઑફ ધ આર્મી સ્ટાફ (COAS) તરીકે નિયુક્ત કરવામાં આવ્યા હતા

લેફ્ટનન્ટ જનરલ ધીરજ સેઠ

લેફ્ટનન્ટ જનરલ ધીરજ સેઠને ગઈ કાલે આગામી ચીફ ઑફ ધ આર્મી સ્ટાફ (COAS) તરીકે નિયુક્ત કરવામાં આવ્યા હતા. તેમનો કાર્યકાળ ૨૦૨૮ની ૩૧ ઑગસ્ટ સુધી રહેશે. સરકારે એક નિવેદનમાં જણાવ્યું હતું કે તેઓ ૩૦ જૂને પદભાર સંભાળશે. હાલના આર્મી ચીફ જનરલ ઉપેન્દ્ર દ્વિવેદી ૩૦ જૂને સેવામાંથી નિવૃત્ત થશે. તેમની નિયુક્તિ એવા સમયે થઈ છે જ્યારે સેના આધુનિકીકરણ અને ભવિષ્યના પડકારોની રણનીતિક તૈયારી પર તેજીથી કામ કરી રહી છે. 

લેફ્ટનન્ટ જનરલ ધીરજ સેઠ હાલમાં ભારતના ૪૯મા વાઇસ ચીફ ઑફ ધ આર્મી સ્ટાફ (VCOAS) તરીકે સેવા આપી રહ્યા છે. આ પદ તેમણે આ વર્ષે એપ્રિલમાં સંભાળ્યું હતું. લેફ્ટનન્ટ જનરલ ધીરજ સેઠને તેમની વિશિષ્ટ સેવા બદલ ૨૦૨૫માં પરમ વિશિષ્ટ સેવા મેડલ (PVSM), ૨૦૨૬માં ઉત્તમ યુદ્ધ સેવા મેડલ (UYSM) અને ૨૦૨૨માં અતિ વિશિષ્ટ સેવા મેડલ (AVSM) એનાયત કરવામાં આવ્યા છે.

તેમના પિતા લેફ્ટનન્ટ જનરલ (રિટાયર્ડ) કૃષ્ણ મોહન સેઠ ૧૯૯૭માં સેનામાં એડજુટેન્ટ પદ પરથી રિટાયર થયા હતા.