મધ્યાહ્‌ન ભોજનમાં સાપનું બચ્ચું મળ્યું

બિહારની ઘટના : ૨૫૦ સ્ટુડન્ટ્સને હૉસ્પિટલમાં દાખલ કરવામાં આવ્યા

બિહારના સહરસામાં ગઈ કાલે હૉસ્પિટલમાં સારવાર લઈ રહેલાં બાળકો.

બિહારના સહરસા જિલ્લાની મહિષી બ્લૉકની એક સરકારી સ્કૂલમાં પીરસવામાં આવતા મધ્યાહન ભોજનમાં સાપનું બચ્ચું મળી આવતાં ૨૫૦થી વધુ સ્ટુડન્ટ્સને હૉસ્પિટલમાં દાખલ કરવામાં આવ્યા હતા. એક નૉન-ગવર્નમેન્ટલ ઑર્ગેનાઇઝેશન (NGO) દ્વારા આપવામાં આવેલા ભોજનને ખાધા પછી તરત જ સ્ટુડન્ટ્સને ઊલટી થવા લાગી હતી અને ઘણાએ ચક્કરની ફરિયાદ કરી હતી. મોટી સંખ્યામાં બાળકો બેભાન થઈ જતાં સ્કૂલ-પરિસરમાં અંધાધૂંધી ફેલાઈ ગઈ હતી. શરૂઆતમાં બાળકોને નજીકના આરોગ્યકેન્દ્રમાં લઈ જવામાં આવ્યાં હતાં અને બાદમાં તેમની સ્થિતિ વધુ ખરાબ થતાં ૧૧૫ સ્ટુડન્ટ્સને સદર હૉસ્પિટલમાં દાખલ કરવામાં આવ્યા હતા. રાહતની વાત એ છે કે મોટા ભાગનાં બાળકો હવે ખતરાથી બહાર હોવાનું જાણવા મળ્યું છે. અધિકારીઓએ આ ઘટનાની તપાસ શરૂ કરી છે અને ખોરાકના નમૂના લેવામાં આવ્યા છે.