દિલ્હીમાંથી મૉન્સૂનની અલવિદા, ૨૦૦૨ બાદ ચોમાસાએ વહેલી વિદાય લીધી

દિલ્હી અને વાયવ્ય ભારતના અન્ય ભાગોમાં ધીમે-ધીમે સૂકું હવામાન છવાઈ જવાની શક્યતા છે.

પ્રતીકાત્મક તસવીર

ભારતીય હવામાન વિભાગે જણાવ્યું હતું કે ગઈ કાલે ૨૩ સપ્ટેમ્બરે દિલ્હીમાંથી સાઉથવેસ્ટ મૉન્સૂનની વિદાય થઈ ગઈ છે. વર્ષ ૨૦૦૨માં ચોમાસાએ ૨૦ સપ્ટેમ્બરે વિદાય લીધી હતી, ત્યાર બાદ દિલ્હીમાંથી ચોમાસાની આ સૌથી વહેલી વિદાય છે. ચોમાસું પંજાબ, હરિયાણા અને રાજસ્થાનના મોટા ભાગના વિસ્તારો તેમ જ ઉત્તર પ્રદેશ અને ગુજરાતના કેટલાક ભાગોમાંથી પણ પાછું ફરી ગયું છે. હવે જેમ-જેમ ચોમાસું દૂર જઈ રહ્યું છે એમ દિલ્હી અને વાયવ્ય ભારતના અન્ય ભાગોમાં ધીમે-ધીમે સૂકું હવામાન છવાઈ જવાની શક્યતા છે.
ચોમાસાની વિદાયનો અર્થ એવો નથી કે દરેક જગ્યાએ વરસાદ તરત જ બંધ થઈ જાય છે. હવામાન વિભાગ વરસાદમાં લાંબા સમયનો વિરામ, ભેજનું ઘટતું પ્રમાણ અને વાતાવરણના નીચલા સ્તરમાં ‘અૅન્ટિસાઇક્લોન’ની રચના જેવી વિવિધ હવામાન પરિસ્થિતિઓને ધ્યાનમાં લીધા બાદ જ ચોમાસાની વિદાયની જાહેરાત કરે છે.