કૉન્ગ્રેસને પણ ખબર છે કે કામ તો મોદી જ કરી શકશે

રિપબ્લિક ટીવીની સમિટમાં નરેન્દ્ર મોદીએ આવું કહીને ટોણો માર્યો કે એટલે જ કૉન્ગ્રેસ કીધા કરે છે કે મોદીજી, આ કરવાની જરૂર છે અને તે કરવાની જરૂર છે

નરેન્દ્ર મોદી

વડા પ્રધાન નરેન્દ્ર મોદીએ સોમવારે રિપબ્લિક સમિટ 2026માં કૉન્ગ્રેસ પર પ્રહારો કરતાં આરોપ લગાવ્યો કે કૉન્ગ્રેસ પાર્ટીના નેતૃત્વ હેઠળના યુનાઇટેડ પ્રોગ્રેસિવ અલાયન્સ (UPA)ના ૧૦ વર્ષના શાસન દરમ્યાન સરકાર પ્રત્યે લોકોને ભારે અસંતોષ હતો અને લોકોને લાગતું હતું કે કંઈ બદલાઈ શકે એમ નથી.

કેન્દ્ર સરકારનાં કાર્યોની ગતિને કારણે લોકોની વધતી અપેક્ષાઓ વિશે વાત કરતાં નરેન્દ્ર મોદીએ કહ્યું હતું કે ‘અમારી સરકાર જે રીતે કાર્ય કરી રહી છે એનાથી દેશના લોકોની આકાંક્ષાઓમાં નોંધપાત્ર વધારો થયો છે. જ્યારે એક કાર્ય પૂરું થાય છે ત્યારે માગણી ફક્ત ત્યાં જ સમાપ્ત થતી નથી, લોકો વધુ સારા કાર્યની અને વધુ આધુનિક સુવિધાઓની ઇચ્છા રાખે છે. કેટલાક આને અસંતોષ તરીકે જોઈ શકે છે, પરંતુ એ વાસ્તવમાં એક આકાંક્ષા છે. આપણા દેશમાં એક ચોક્કસ જૂથ છે જે અનુભવે છે કે આ બધામાં કંઈક ખોટું છે, પરંતુ આખરે લોકોની આવી અપેક્ષાઓ કોની પાસેથી હશે? તેઓ સ્વાભાવિક રીતે જ એવી વ્યક્તિ તરફ વળશે જે ખરેખર પરિણામો આપે છે. આ જ કારણે માત્ર સામાન્ય લોકો જ નહીં, કૉન્ગ્રેસ પણ સતત માગણી કરે છે કારણ કે તેમને પણ વિશ્વાસ છે કે જો કોઈ કાર્ય પૂરું કરી શકે છે તો એ આ સરકાર જ છે. કૉન્ગ્રેસ પક્ષ પણ કહેતો રહે છે કે મોદીજી, આ કરવાની જરૂર છે, તે કરવાની જરૂર છે.’

બીજું શું કહ્યું?
- આજે વિશ્વ સ્થાપિત ધોરણોને પડકારી રહ્યું છે અને વિક્ષેપનું પ્રમાણ વિશાળ બની ગયું છે. આની બીજી બાજુ પણ છે, કારણ કે આ પડકારો નવી તકો પણ લાવી રહ્યા છે.
- દેશમાં દરેક યુવાન, ઉદ્યોગ-સાહસિક, ઇનોવેટર અને સ્ટાર્ટઅપે તક પર ધ્યાન કેન્દ્રિત કરવું જોઈએ અને સરકાર નેશન ફર્સ્ટ ભાવનાથી પ્રેરિત થઈને તેમની સાથે સંપૂર્ણ રીતે ઊભી છે. 
- ભારત રિફૉર્મ એક્સપ્રેસમાં સવાર થઈ ગયું છે અને આ ગતિ ફક્ત ઝડપી બનશે. જેમ આપણું સપનું ભવ્ય છે એમ આપણા પ્રયાસો પણ એટલા જ પ્રચંડ હશે. ૧.૪ અબજ નાગરિકોનો આ સામૂહિક પ્રયાસ નિઃશંકપણે વિકસિત ભારતનું નિર્માણ કરશે.
- હું આત્મવિશ્વાસ સાથે કહું છું કે તમે તમારી પોતાની આંખોથી એક વિકસિત ભારત જોશો. હું એવી રીતે કામ કરતો નથી જેના માટે ભવિષ્યની પેઢીઓએ રાહ જોવી પડે. તમે એને જાતે બનતા જોશો.