નીતીશ કુમારના દીકરા નિશાંત કુમારે JDUમાં પ્રવેશ કર્યો

બિહારના મુખ્ય પ્રધાન નીતીશ કુમારના પુત્ર નિશાંત કુમારે પટનાસ્થિત પાર્ટી મુખ્યાલયમાં જનતા દલ યુનાઇટેડ (JDU)માં સત્તાવાર રીતે પ્રવેશ કર્યો હતો, જેનાથી બિહારના રાજકારણમાં તેમનો ઔપચારિક પ્રવેશ થયો હતો. લાંબા સમય સુધી રાજકારણથી દૂર રહેલા નિશાંતે તેમના પિતા દ્વારા રાજ્યસભા માટે ઉમેદવારી નોંધાવ્યાના થોડા દિવસો પછી રાજકારણમાં પ્રવેશ કર્યો હતો.

૫૦ વર્ષના નિશાંત કુમારે પાર્ટીના નૅશનલ વર્કિંગ પ્રેસિડન્ટ સંજય ઝા પાસેથી પાર્ટીનું સભ્યપદ લઈને ઔપચારિક રીતે પાર્ટીમાં પ્રવેશ કર્યો હતો. આ પ્રસંગે કેન્દ્રીય પ્રધાન લાલન સિંહ, બિહારના નાયબ મુખ્ય પ્રધાન વિજય ચૌધરી સહિત JDUના ઘણા મોટા નેતાઓ અને પાર્ટીના ઘણા કાર્યકરો હાજર રહ્યા હતા. જોકે નીતીશ કુમાર હાજર રહ્યા નહોતા. નિશાંતે પછીથી પિતા નીતીશકુમારનું મોઢું મીઠું કરાવીને પોતાના રાજકારણ-પ્રવેશની ઉજવણી કરી હતી.