અરવિંદ કેજરીવાલ મારો ફોન પણ નથી ઉપાડતા

BJPમાં જોડાયા પછી AAPના ભૂતપૂર્વ વિધાનસભ્યે રડતાં-રડતાં કહ્યું...

રાજેશ ગુપ્તા

આમ આદમી પાર્ટી (AAP)ના ભૂતપૂર્વ વિધાનસભ્ય, દિલ્હીના ઉપાધ્યક્ષ, AAPના કર્ણાટકના પ્રભારી અને વિધાનસભાની અરજી અને અનુમાન સમિતિના ભૂતપૂર્વ અધ્યક્ષ રાજેશ ગુપ્તાએ ગઈ કાલે દિલ્હી ભારતીય જનતા પાર્ટી (BJP)ના પ્રમુખ વીરેન્દ્ર સચદેવની હાજરીમાં BJPમાં પ્રવેશ કર્યો હતો. 

આ પ્રસંગે એક પત્રકાર-પરિષદને સંબોધતાં રાજેશ ગુપ્તા ભાવુક થઈ ગયા હતા અને રડતાં-રડતાં કહ્યું હતું કે ‘AAP એની મૂળ વિચારધારાથી ભટકી ગઈ છે અને ભ્રષ્ટાચારમાં ડૂબી ગઈ છે. અરવિંદ કેજરીવાલ મારો ફોન પણ ઉપાડતા નથી. મારી ૧૦ વર્ષની મહેનત તેઓ ભૂલી ગયા છે. અરવિંદજી, તમારે વિચારવાની જરૂર છે કે લોકો તમને કેમ છોડી રહ્યા છે. AAP હવે એવા લોકોની પરવા કરતી નથી જેમણે અન્ના આંદોલન દરમ્યાન પોતાની નોકરી છોડી દીધી હતી. ઘણા લોકો AAP છોડવા માગે છે અને મને લાગે છે કે તેમણે પાર્ટી છોડી દેવી જોઈએ. તેમણે એવી જગ્યાએ જવું જોઈએ જ્યાં તેમને સન્માન મળે. AAP એક એવી પાર્ટી છે જે એના કાર્યકરોનો ઉપયોગ કરે છે અને પછી ફેંકી દે છે. અમે BJP સાથે વિકાસ અને રાષ્ટ્રવાદના માર્ગે ચાલીશું.’