બંગાળની હાલની મતદારયાદીમાંથી ૨૬ લાખ જેટલા વોટર્સનાં નામ ૨૦૦૨ની યાદી સાથે મેળ નથી ખાતાં

મુખ્ય પ્રધાન મમતા બૅનરજી અને તેમની પાર્ટી તૃણમૂલ કૉન્ગ્રેસ આ પ્રક્રિયાનો ભારે વિરોધ કરીને ચૂંટણીપંચનું કામ વધુ કઠિન કરી રહ્યાં છે

પ્રતીકાત્મક તસવીર

પશ્ચિમ બંગાળમાં ચૂંટણીપંચ તરફથી સ્પેશ્યલ ઇન્ટેન્સિવ રિવિઝન (SIR) પ્રક્રિયા અંતર્ગત મતદારયાદીનું પુન: પરીક્ષણ કામ ચાલી રહ્યું છે. મુખ્ય પ્રધાન મમતા બૅનરજી અને તેમની પાર્ટી તૃણમૂલ કૉન્ગ્રેસ આ પ્રક્રિયાનો ભારે વિરોધ કરીને ચૂંટણીપંચનું કામ વધુ કઠિન કરી રહ્યાં છે. આ પ્રક્રિયા દરમ્યાન ચૂંટણીપંચે દાવો કર્યો છે કે રાજ્યમાં હાલની મતદારયાદીમાં લગભગ ૨૬ લાખ વોટર્સનાં નામ ૨૦૦૨ની યાદી સાથે મેળ નથી ખાઈ રહ્યાં.

આ વિસંગતિ કઈ રીતે પકડાઈ?
રાજ્યના લેટેસ્ટ વોટર-લિસ્ટની સરખામણી જ્યારે ૨૦૦૨ અને ૨૦૦૬ની વચ્ચે વિવિધ રાજ્યોમાં તૈયાર કરવામાં આવેલા લિસ્ટ સાથે કરવામાં આવી ત્યારે યાદીમાં વિસંગતિ હોવાનું નોંધાયું હતું. બુધવારે બપોર સુધીમાં પશ્ચિમ બંગાળમાં છ કરોડથી વધુ ફૉર્મ અપલોડ કરી દેવાયાં હતાં. 

ચૂંટણી-અધિકારીએ કહ્યું હતું કે ‘ફૉર્મ પોર્ટલ પર અપલોડ થાય એ પછી એનું મૅપિંગ થાય છે અને છેલ્લા SIR રેકૉર્ડ સાથે તુલના કરવામાં આવે છે. આ પ્રક્રિયાના શરૂઆતના જ તબક્કામાં નિષ્કર્ષ નીકળ્યો છે કે રાજ્યમાં લગભગ ૨૬ લાખ મતદાતાઓનાં નામનું મૅપિંગ છેલ્લા SIR સાથે મેળ નથી ખાતું.’