સાચું ગ્લોબલાઇઝેશન ભારત લાવશે જેમાં વિશ્વને એક બજાર નહીં પણ પરિવાર બનાવશે : મોહન ભાગવત

મોહન ભાગવત ગઈ કાલે નાગપુરમાં એક કાર્યક્રમમાં ઉપસ્થિત રહ્યા હતા, જ્યાં તેમણે પોતાના ભાષણ દરમ્યાન અનેક બાબતો પર વિચાર રજૂ કર્યા હતા

મોહન ભાગવત

રાષ્ટ્રીય સ્વયંસેવક સંઘના સરસંઘચાલક મોહન ભાગવતે ગઈ કાલે એક કાર્યક્રમમાં કહ્યું હતું કે ‘ગ્લોબલાઇઝેશન અત્યારે એક ભ્રમ છે. વૈશ્વિકીકરણનો સાચો યુગ આવવાનો હજી બાકી છે અને એ યુગ ભારત લાવશે. ભારત તો હંમેશાં ગ્લોબલાઇઝેશનનો વિચાર ધરાવે છે. આપણું સૂત્ર ‘વસુધૈવ કુટુંબકમ’નું છે. ભારત વિશ્વને એક બજાર નહીં બનાવે, એક પરિવાર બનાવશે અને એ જ સાચા વૈશ્વિકીકરણનો સાર હશે.’

મોહન ભાગવત ગઈ કાલે નાગપુરમાં એક કાર્યક્રમમાં ઉપસ્થિત રહ્યા હતા, જ્યાં તેમણે પોતાના ભાષણ દરમ્યાન અનેક બાબતો પર વિચાર રજૂ કર્યા હતા. તેમણે પોતાના ભાષણમાં જ્ઞાનના મહત્ત્વ પર પણ ભાર મૂક્યો હતો અને કહ્યું હતું કે ‘વિવેક અને વ્યાવહારિક સમજ તરફ લઈ જાય એ સાચું જ્ઞાન છે. માત્ર જાણકારીઓથી જીવન સાર્થક નથી થતું.’

બીજું શું કહ્યું મોહન ભાગવતે?
 વિવાદોમાં પડવું એ ભારતનો સ્વભાવ નથી. ભારતની પરંપરા ભાઈચારો અને એકજૂટતા છે.
 ભારતનો રાષ્ટ્રવાદ અહંકારમાંથી નથી જન્મતો, પણ ભારતીયોના પરસ્પરના સંબંધ અને પ્રકૃતિ સાથેના આપણા સહઅસ્તિત્વમાંથી ઉદ્ભવે છે.
 માનવતાના લાભ માટે આર્ટિફિશ્યલ ઇન્ટેલિજન્સનો ઉપયોગ માનવતાને બહેતર બનાવવા થવો જોઈએ. એનો કન્ટ્રોલ આપણા હાથમાં રહેવો જોઈએ.