22 March, 2026 11:27 AM IST | Jharkhand | Gujarati Mid-day Correspondent
એક વિશાળ જીવંત બૉમ્બ
ઝારખંડના જમશેદપુરના બહરાગોરા પોલીસ-સ્ટેશન વિસ્તારમાં સુવર્ણરેખા નદીના કિનારે રેતી ખોદતી વખતે એક વિશાળ જીવંત બૉમ્બ મળી આવ્યો હતો. આ ઘટના પાણીપડા નાગુડાસાઈ ગામ નજીક બની હતી. ત્યાં ગ્રામજનો નદી કિનારે રેતી ખોદતા હતા ત્યારે જમીનમાંથી એક ભારે, ગોળાકાર લોખંડની વસ્તુ બહાર આવી હતા જેને કારણે રહેવાસીઓએ તાત્કાલિક પોલીસને જાણ કરી હતી.
પોલીસે તપાસ કરીને એ બૉમ્બ જીવંત હોવાની પુષ્ટિ કરી હતી અને તેથી સુરક્ષા એજન્સીઓને અલર્ટ કરવામાં આવી હતી અને બૉમ્બ ડિસ્પોઝલ સ્ક્વૉડને બોલાવવામાં આવી હતી. બૉમ્બ અત્યંત શક્તિશાળી અને ખતરનાક છે.
આ આશરે ૫૦૦ પાઉન્ડ (આશરે ૨૨૭થી ૨૫૦ કિલો) વજનનો અમેરિકન મિસાઇલ બૉમ્બ છે જે હજી પણ સક્રિય સ્થિતિમાં છે. આ બૉમ્બ ગૅસ સિલિન્ડર જેવા આકારનો છે અને એના પર મૉડલ-નંબર AN-M64 અને મેડ ઇન અમેરિકા લખેલું છે. આ બૉમ્બ બીજા વિશ્વયુદ્ધનો હોઈ શકે છે અને કોઈક રીતે નદી કિનારે કાદવ અને રેતી નીચે દટાઈ ગયો હશે.
