14 May, 2026 12:35 PM IST | Singapore | Gujarati Mid-day Correspondent
પ્રિયંકા સિન્હા નામની ઇન્ફ્લુએન્સરે વિડિયો શૅર કર્યો હતો
સિંગાપોર કડક કાયદા અને શિસ્ત માટે દુનિયાભરમાં જાણીતું છે. જોકે હાલમાં અહીંનો એક કાયદો સોશ્યલ મીડિયામાં ચર્ચાનો વિષય બની ગયો છે. એક વાઇરલ વિડિયોમાં ભારતીય કન્ટેન્ટ-ક્રીએટરે દાવો કર્યો હતો કે સિંગાપોરમાં રોડ પર પડેલી કેરી પણ ઉઠાવવી નહીં, જો એમ કરો તો ૫૦૦૦ સિંગાપોર ડૉલર એટલે કે લગભગ ૩.૭૪ લાખ રૂપિયાનો દંડ થઈ શકે છે. પ્રિયંકા સિન્હા નામની ઇન્ફ્લુએન્સરે વિડિયો શૅર કર્યો હતો જેમાં વૃક્ષો પર પાકી ગયેલી કેરીઓ દેખાય છે અને રોડની કિનારીએ કેટલીક કેરીઓ તૂટીને પડેલી પણ દેખાય છે. એ વિડિયોમાં પ્રિયંકા કહે છે, ‘આ કેરીઓ અહીં જોવાનું ભલે બહુ સારું લાગતું હોય, એને ઉઠાવવાનું કાયદાકીય રીતે ખોટું છે. સિંગાપોરમાં સરકારી જમીન પર લાગેલાં વૃક્ષો પરનાં ફળ પણ સરકારની સંપત્તિ મનાય છે. એવામાં વૃક્ષ પરથી ફળ તોડવાની વાત તો દૂર રહી, જમીન પર પડેલાં ફળો પણ અનુમતિ વિના ઉઠાવી લેવાં એ ગુનો ગણાય છે. ’
સિંગાપોર મિનિસ્ટ્રી ઑફ નૅશનલ ડેવલપમેન્ટનું કહેવું છે કે ‘રાજ્યની જમીન પર લાગેલાં વૃક્ષો અને અને વૃક્ષ પર લાગેલાં ફળો સરકારી અધિક્ષેત્રમાં ગણાય છે. અહીંની N Parks નામની સંસ્થા આ વૃક્ષોની દેખરેખ કરે છે. જો કોઈ વ્યક્તિ વૃક્ષ પરથી ફળ તોડે અથવા તો તૂટીને પડેલું ફળ ઉઠાવવા માગે તો પહેલાં એ સંસ્થાની અનુમતિ લેવી જરૂરી છે.’
