૯૯ વર્ષના માજીએ કર્યું ક્રાઉડ-સર્ફિંગ

ક્રાઉડ-સર્ફિંગમાં એક સ્ટ્રેચર પર તમારે સૂઈ જવાનું હોય અને એ સ્ટ્રેચર હજારો લોકોના ટોળાએ ઊંચકીને ફેરવવાનું હોય

પૉલિનના પૌત્ર રૉસ સ્મિથે ક્રાઉડ-સર્ફિંગ ઇવેન્ટ યોજી હતી અને એમાં પૉલિનબા સ્ટ્રેચર પર સૂઈ ગયાં હતાં

દરિયાનાં મોજાં પર સર્ફિંગ તો બધા કરે, પણ અમેરિકાનાં એક માજીએ ક્રાઉડ-સર્ફિંગ કરીને ગિનેસ વર્લ્ડ રેકૉર્ડ બનાવ્યો છે. ક્રાઉડ-સર્ફિંગમાં એક સ્ટ્રેચર પર તમારે સૂઈ જવાનું હોય અને એ સ્ટ્રેચર હજારો લોકોના ટોળાએ ઊંચકીને ફેરવવાનું હોય. ટોળાના લોકો હાથ ઊંચા કરીને આ સ્ટ્રેચરને હાથ આપીને આગળ વધારતા જાય અને તમારી સાથે એ સ્ટ્રેચર માણસોનાં મોજાં પર સતત આગળ વધતું રહે એને ક્રાઉડ-સર્ફિંગ કહેવાય. આ સ્ટન્ટમાં સ્ટ્રેચર પર સૂઈને મોજાની જેમ ટોળા પરથી વહેવા માટે પણ હિંમત જોઈએ. જોકે આ કામ પૉલિન કૅના નામનાં ૯૯ વર્ષ અને ૨૭૪ દિવસનાં માજીએ કર્યું હતું. પૉલિનના પૌત્ર રૉસ સ્મિથે ક્રાઉડ-સર્ફિંગ ઇવેન્ટ યોજી હતી અને એમાં પૉલિનબા સ્ટ્રેચર પર સૂઈ ગયાં હતાં. બીજી મેએ અમેરિકાના ટેક્સસ રાજ્યના બેલવિલમાં યોજાયેલી એક કૉન્સર્ટમાં આ ઇવેન્ટ થઈ હતી જેને ગિનેસ વર્લ્ડ રેકૉર્ડ્સમાં સ્થાન મળ્યું હતું.

પૌત્ર પોતાની દાદીને ગૅન્ગસ્ટર ગ્રૅનીના હુલામણા નામે બોલાવે છે કેમ કે આ દાદીની હિંમત કોઈ ગૅન્ગસ્ટરથી કમ નથી. ગૅન્ગસ્ટર ગ્રૅનીએ સૌથી મોટી ઉંમરે ક્રાઉડ સર્ફ કરવાનો વિક્રમ બનાવ્યો હતો.