આસામમાં ચોરી કરતા પકડાયેલા યુવકને બે કલાક ઝુબીન ગર્ગના ગીત પર નચાવ્યો

આસપાસ મોજૂદ લોકોએ તેમનો વિડિયો લીધો હતો અને સોશ્યલ મીડિયા પર શૅર કર્યો હતો.

વાયરલ વીડિયોમાંથી સ્ક્રીન શૉટ

આસામના શિવસાગર જિલ્લામાં બે યુવકો ચોરી કરતા પકડાયા હતા. આ નવશીખિયા ચોરોને લોકોએ પકડી પાડ્યા હતા. સામાન્ય રીતે ચોર પકડાય એટલે લોકો તેની મારઝૂડ કરી મૂકે. જોકે અહીંના લોકોએ ચોરોને પોલીસને હવાલે કરવાનું નક્કી કર્યું અને એ પહેલાં તેમને યાદ રહી જાય એવી સજા આપવા માટે નચાવ્યા. ઝુબીન ગર્ગનાં ગીતો પર આ ચોરોને એટલું નચાવ્યા, એટલું નચાવ્યા કે તેઓ થાકીને ઢીલાઢસ થઈ ગયા. થાકી ગયેલા ચોરોને નાસ્તો કરાવીને પોલીસને હવાલે કરવામાં આવ્યા. આસામમાં આ પહેલાં પણ ચોરી કરતા યુવકને પરાણે નાચવાની સજા કરવામાં આવી હતી. એ પછી તો અહીં જાણે ટ્રેન્ડ પડી ગયો હોય એવું લાગે છે. ચોર પકડાય તો તેને મારવાને બદલે નચાવીને થકવવાનો અને પછી પોલીસને હવાલે કરવાનો. ચોરો નાચતા હતા એ વખતે આસપાસ મોજૂદ લોકોએ તેમનો વિડિયો લીધો હતો અને સોશ્યલ મીડિયા પર શૅર કર્યો હતો.