દીકરાને ગેમિંગની લત છોડાવવા જતાં ચાઇનીઝ મમ્મીને ૬૦ વર્ષે લાગ્યો લાઇવ ગેમિંગનો ચસકો

ઝોન્ગ જુઆન્જુઆન નામની મહિલા ચાઇનીઝ ઑનલાઇન ગેમિંગ ઇન્ડસ્ટ્રીમાં લાડથી આન્ટી જુઆન તરીકે જાણીતાં છે.

ઝોન્ગ જુઆન્જુઆન

ઝોન્ગ જુઆન્જુઆન નામની મહિલા ચાઇનીઝ ઑનલાઇન ગેમિંગ ઇન્ડસ્ટ્રીમાં લાડથી આન્ટી જુઆન તરીકે જાણીતાં છે. આન્ટી જુઆનને જુવાનીમાં જરાય કમ્પ્યુટર આવડતું નહોતું. ઇન ફૅક્ટ, તેઓ જ્યાં રહેતાં હતાં એ ગામમાં તો છેક હજી એક દાયકા પહેલાં સુધી ઇન્ટરનેટ માટે કૅફે પર જવું પડતું હતું. જોકે તેમનો દીકરો ગેમિંગનો જબરો શોખીન હતો. તેણે આખી જિંદગી છૂટક કામો કરીને માંડ ઘર ચલાવ્યું હતું. જોકે તેને પોતાના દીકરાની ગેમિંગની આદત બિલકુલ ગમતી નહોતી. તેને લાગતું હતું કે દીકરો ગેમ રમવામાં સમય બરબાદ કરી રહ્યો છે. દીકરો નાનો હતો ત્યારે તેનું ગેમિંગ છોડાવવા તેને ખૂબ પનિશમેન્ટ પણ કરી, પણ દીકરો સુધર્યો નહીં. ઊલટાનું દીકરાએ માને કહ્યું કે જો તારે છૂટક પાર્ટ-ટાઇમ કામોમાંથી છુટકારો જોઈતો હોય તો કમ્પ્યુટર શીખી જા. શરૂઆતમાં તો આન્ટી જુઆન ન માન્યાં, પણ ૨૦૨૦માં કોરોનાના સમયમાં બધું જ કામ ઠપ્પ થઈ ચૂક્યું હતું ત્યારે તેમણે દીકરા પાસેથી કમ્પ્યુટર શીખ્યું. ગેમ રમવાનું શરૂ કર્યું અને પછી તો એવો ચસકો લાગ્યો કે આજે આન્ટી જુઆનનાં ઑનલાઇન ગેમિંગ માટે લગભગ ૩ લાખ ફૉલોઅર્સ છે અને ઑનલાઇન ગેમિંગ દ્વારા આન્ટી આસાનીથી જીવી શકાય એટલી કમાણી કરી લે છે.