ચાર વર્ષના બાળકે ઇમર્જન્સી લાઇન પર પોલીસને કહ્યું, મારે તમને રમકડાંનું કલેક્શન બતાવવું છે

ન્યુ ઝીલૅન્ડની પોલીસ દોડી આવી

સોશ્યલ મીડિયા પર આ ઘટના શૅર કરી પોલીસ-અધિકારીએ

ન્યુ ઝીલૅન્ડમાં ૪ વર્ષના એક બાળકે પોલીસના ઇમર્જન્સી નંબર પર કૉલ કરી દીધો. કર્યો તો કર્યો, પણ પોલીસને ઘરે આવવાનું જાણે આમંત્રણ આપતો હોય એમ કહ્યું કે મારી પાસે રમકડાંનું બહુ મોટું કલેક્શન છે એ જોવા આવો. પોલીસને પહેલાં નવાઈ લાગી. કૉલ પરના ઑફિસરે તેને થોડાક સવાલો પણ કર્યા પણ છોકરાએ કહ્યું કે તેને કોઈ તકલીફ નથી, માત્ર મારાં ટૉય્ઝનું કલેક્શન તમે જુઓ એવું ઇચ્છું છું. સામાન્ય રીતે આવા કૉલને ટાઇમપાસ સમજીને કાપી નાખવામાં આવે છે, પણ પોલીસવાળાએ છોકરા સાથે આડીઅવળી ઘણી વાતો કરીને ઊલટતપાસ કરી કે તેના ઘરમાં કંઈ તકલીફ છે કે શું? પણ બાળકે શાંતિથી જવાબો આપ્યા એ પરથી સુનિશ્ચિત થઈ ગયું કે તેના ઘરે કોઈ ઇમર્જન્સી નથી. એટલે પોલીસ-અધિકારીએ પોતાની ડ્યુટી પૂરી થયા પછી પેલા છોકરાના ઘરે જવાનું નક્કી કર્યું અને ગયો પણ ખરો. ત્યાં બાળકે તેને ખૂબ ઉત્સાહપૂર્વક પોતાનાં ટૉય્ઝ બતાવ્યાં. સોશ્યલ મીડિયા પર આ ઘટના શૅર કરીને પોલીસ-અધિકારીએ કહ્યું હતું, ‘ખરેખર એ બાળક પાસે રમકડાંનું શાનદાર કલેક્શન હતું.’