21 February, 2026 01:36 PM IST | Ankara | Gujarati Mid-day Correspondent
રેડ બુલ દ્વારા સ્પૉન્સર થયો હતો સ્ટન્ટ
ઇટલીમાં ડારિયો કોસ્ટા નામના પાઇલટે એવિએશન ઇન્ડસ્ટ્રીમાં ઇતિહાસ રચતું કારનામું કર્યું હતું. રેડ બુલ દ્વારા સ્પૉન્સર થયેલા આ સ્ટન્ટમાં પાઇલટે ૧૨૦ કિલોમીટર પ્રતિ કલાકની ઝડપે દોડતી ટ્રેન પર પ્લેન ટચ કરીને ફરીથી ત્યાંથી ટેકઑફ કરવાનું હતું. ડારિયોએ આ સ્ટન્ટ સફળતાપૂર્વક કરી દેખાડ્યો હતો. તુર્કિયેમાં આ સ્ટન્ટ થયો હતો. અહીં ઝિવકો એજ ૫૪૦ નામની કાર્ગો ટ્રેન સૌથી ઝડપી ટ્રેન છે. આ ટ્રેન પર ડારિયોએ એક પ્લેન ઉડાડ્યું હતું એટલું જ નહીં, એના છેલ્લા ડબ્બા પર બનેલા હેલિપૅડ જેવા પ્લૅટફૉર્મ પર લૅન્ડ કરીને ફરીથી ટેક-ઑફ કર્યું હતું. પાઇલટનું કહેવું છે કે તેણે જ્યારે પ્લેન લૅન્ડ કર્યું ત્યારે તેને કૉકપિટ પરથી ટ્રેનનો છેલ્લો ડબ્બો દેખાઈ જ નહોતો રહ્યો. એવામાં તેણે માત્ર આગળ દોડી રહેલી ટ્રેનના સહારે જજમેન્ટ લઈને બ્લાઇન્ડ લૅન્ડિંગ કરાવ્યું હતું.
આ સ્ટન્ટ દરમ્યાન દોડતી ટ્રેનની પાછળ હવાનું દબાણ પણ ખૂબ હતું. જોરથી વાતા પવનને કારણે ટૂ-સીટર હલકા-ફૂલકા પ્લેનનું બૅલૅન્સ પણ બગડી રહ્યું હતું. એમ છતાં ડારિયોએ ખૂબ સટિક રીતે ૧૨૦ કિલોમીટર પ્રતિ કલાકની ગતિએ દોડતી ટ્રેન પર પ્લેન લૅન્ડ કર્યું હતું અને એ પછી તરત ટેક-ઑફ પણ કર્યું હતું. ડારિયો અને તેની ટીમે આ સ્ટન્ટ માટે બે વર્ષથી મહેનત કરી હતી. અસલી ટ્રેન પર પ્રૅક્ટિસ કરવાનું મુશ્કેલ હોવાથી તેમણે જમીન પર હવાનું દબાણ ક્રીએટ કરીને સ્પીડ કન્ટ્રોલ સાથે આ સ્ટન્ટની પ્રૅક્ટિસ કરી હતી.
