02 February, 2026 04:42 PM IST | Uttar Pradesh | Gujarati Mid-day Online Correspondent
પ્રતિકાત્મક ફાઇલ તસવીર
ઉત્તર પ્રદેશના દેવરિયા જિલ્લામાં એક ચોંકાવનારી ઘટનાએ સમગ્ર સોશિયલ મીડિયાનું ધ્યાન ખેંચ્યું છે. એક પરિવારે આરોપ લગાવ્યો છે કે તેમના દીકરાને ફ્રી મોમોઝની લાલચ આપીને તેની પાસેથી આશરે રૂ. 85 લાખના દાગીના લૂંટી લેવામાં આવ્યા હતા. મીડિયા રિપોર્ટ્સ અનુસાર, આ વિસ્તારમાં મોમોઝની દુકાન ચલાવતા ત્રણ લોકોએ બાળક સાથે મિત્રતા કરી હતી. બાળકને મોમોઝ ખૂબ ભાવતા હતા. દુકાનદારોએ તેને વારંવાર મફત મોમોઝ ઓફર કર્યા અને ધીમે ધીમે તેનો વિશ્વાસ જીત્યો.
બાળકના પિતા, મૂળ વારાણસીના અને હાલમાં દેવરિયામાં રહેતા, એક મંદિરમાં પૂજારી છે. તેમનું કહેવું છે કે આરોપીએ બાળકના મોમોઝના વ્યસનનો લાભ લીધો અને તેને કબાટમાંથી દાગીના લાવવા કહ્યું હતું. એવો આરોપ છે કે બાળકે મફત મોમોઝના બદલામાં મોમોઝ વેચનારાઓને દાગીના આપ્યા હતા.
થોડા દિવસો પછી એક સંબંધીએ દાગીના વિશે પરિવારને પૂછ્યું ત્યારે આ મામલો પ્રકાશમાં આવ્યો. પરિવારે કબાટ ખોલ્યું અને જોયું કે દાગીના ગાયબ છે. જ્યારે બાળકની પૂછપરછ કરવામાં આવી ત્યારે તેણે કહ્યું કે તેણે મોમોઝ વેચનારાઓને દાગીના આપ્યા હતા જેથી તેને મફત મોમોઝ મળતા રહે.
ઘટના પ્રકાશમાં આવ્યા પછી, પરિવારે પોલીસમાં ફરિયાદ નોંધાવી અને ત્રણ આરોપીઓના નામ આપ્યા. પોલીસે કેસ નોંધીને તપાસ શરૂ કરી છે. તેમનું કહેવું છે કે તેઓ દાગીના શોધી રહ્યા છે અને સમગ્ર મામલાની તપાસ કરી રહ્યા છે.
ઘણી વાર બૅન્કની ભૂલને કારણે અચાનક જ કોઈકના અકાઉન્ટમાં કરોડો રૂપિયા ટ્રાન્સફર થઈ ગયા હોવાનો ગોટાળો થઈ જાય છે. જોકે મોટા ભાગે આવા કેસમાં બૅન્કો એ ટ્રાન્સફરને રિવર્સ કરી દેતી હોય છે. જોકે નાઇજીરિયામાં કંઈક જુદું જ થયું. નાઇજીરિયાની ફર્સ્ટ બૅન્કે ૨૦૨૫ના નવેમ્બર મહિનામાં એક કસ્ટમરના અકાઉન્ટમાં ભૂલથી ૧૦ કરોડ રૂપિયા ટ્રાન્સફર કરી દીધા. કસ્ટમરનું નામ ઓગો એહોસા કિંગ્સલે છે. દોઢડાહ્યા ઓગોભાઈને જેવી ખબર પડી કે પોતાના અકાઉન્ટમાં ક્યાંકથી ૧૦ કરોડ રૂપિયા આવ્યા છે એટલે તરત જ તેમણે બધા રૂપિયા પોતાની મા અને બહેનના અકાઉન્ટમાં ટ્રાન્સફર કરી દીધા. બૅન્કને જ્યારે ભૂલ સમજાઈ અને ઓગોના અકાઉન્ટનું બૅલૅન્સ તપાસ્યું ત્યારે ખબર પડી કે ભૂલથી જે અકાઉન્ટમાં રૂપિયા ગયેલા એ અકાઉન્ટમાંથી પણ રકમ આગળ વધી ગઈ છે. આખરે ઇકૉનૉમિકલ ઍન્ડ ફાઇનૅન્શિયલ ક્રાઇમ્સ કમિશને થોડા દિવસ પહેલાં ઓગોને પકડી લીધો. કોર્ટે ઓગોને બે વિકલ્પ આપ્યા. પહેલો વિકલ્પ હતો પૈસા જ્યાં પણ ટ્રાન્સફર કર્યા છે ત્યાંથી પાછા બૅન્કને આપીને તે ઘરે જાય અથવા તો એક વરસની જેલની સજા ભોગવે. ઓગોભાઈએ બીજો વિકલ્પ પસંદ કર્યો. એક વર્ષ જેલમાં રહેવાથી જો ૧૦ કરોડ રૂપિયા તેના પોતાના થઈ જતા હોય તો એ ખોટનો સોદો નથી. જોકે કોર્ટમાં કેસ ચાલતો હતો એ દરમ્યાન જ તેના અકાઉન્ટમાંથી ૧.૯૭ કરોડ રૂપિયા અને તેની મા-બહેનના અકાઉન્ટમાંથી કુલ ૫.૨૬ કરોડ રૂપિયા જપ્ત કરી લીધા હતા. એ પછી પણ ઓગો પાસે ૩ કરોડથી વધુની રકમ બચતી હતી એટલે તેણે પૈસા પાછા આપવાને બદલે એક વર્ષની જેલ પસંદ કરી લીધી. હવે તે જ્યારે જેલમાંથી પાછો આવશે ત્યારે ૩ કરોડ રૂપિયા આરામથી વાપરી શકશે.
