પતિએ પાંચ કલાક મતદાન-બૂથની બહાર રાહ જોઈ, આખરે પત્ની ઝડપાઈ ગઈ

બે વર્ષ પહેલાં પ્રેમી સાથે ભાગી ગયેલી પત્નીને પકડવા પતિએ પાંચ કલાક મતદાન-બૂથની બહાર રાહ જોઈ, આખરે પત્ની ઝડપાઈ ગઈ

પ્રતીકાત્મક તસવીર

પશ્ચિમ બંગાળના સિલિગુડીમાં ગુરુવારે મતદાન થયું. જોકે એક યુવક બે વર્ષથી જાણે આ જ દિવસની રાહ જોઈ રહ્યો હતો. વાત એમ હતી કે તેની પત્ની બે વર્ષ પહેલાં કોઈને કહ્યા વિના તેના પ્રેમી સાથે ભાગી ગઈ હતી. તેને ખાતરી હતી કે પત્ની મતદાન કરવા માટે પોલ‌િંગ બૂથ પર આવશે. એ વખતે પત્નીને પકડીને તેને બરાબર પાઠ ભણાવવાનું તેણે નક્કી કરી લીધેલું. ગુરુવારે વહેલી સવારે આ ભાઈ પોતાના મતદાનમથકે પહોંચી ગયા હતા. તારાવાડી ગામની એક સ્કૂલમાં તેમનું બૂથ હતું. અહીં તે સવારથી ચૂપચાપ ખૂણામાં ઊભો હતો. કોઈની સાથે વાતચીત કર્યા વિના ટસનો મસ થયા વિના તે ત્યાં જ ઊભો હતો. બપારે બે વાગ્યાના અરસામાં તેની તપસ્યા ફળી. તેની પત્ની મત આપવા આવી અને આ ભાઈએ તેના વાળ ખેંચીને તેને પકડી લીધી. ત્યાંની સિક્યૉરિટીએ તરત જ આવીને પેલી મહિલાને છોડાવી લીધી. જોકે જ્યારે પેલા માણસે પોતાની આપવીતી કહી ત્યારે ત્યાં ઊભેલા સૌ દંગ રહી ગયા. પતિને એટલો ગુસ્સો હતો કે તે કહેતો હતો કે તેની પત્નીને મત આપવા જ ન દેવો જોઈએ, પણ તેનું કંઈ ચાલ્યું નહીં. પોલીસોએ પેલી મહિલા સુરક્ષિત જતી રહે ત્યાં સુધી યુવકને પકડી રાખ્યો હતો. ચૂંટણી-અધિકારીઓનું કહેવું છે કે તેમણે આ પહેલાં ક્યારેય મતદાનમથક પર આવો કેસ જોયો નથી.