નર્સે જાતે જ પોતાના પતિને ટૉઇલેટ ક્લીનરનું ઇન્જેક્શન આપીને પતાવી નાખ્યો

આ અકસ્માતમાં તે બચી ન જાય એ માટે નર્સ તરીકે કામ કરતી પત્નીએ તેનું ખુરાફાતી દિમાગ ચલાવ્યું હતું

પોલીસે મરનારની પત્ની અને પ્રેમીને પકડી લીધાં હતાં

આજકાલ પત્નીઓની હિંસાના કિસ્સાઓ ખૂબ જ સાંભળવા મળે છે. અત્યાર સુધી ઉત્તર ભારતમાં જ સાંભળવા મળતા હતા. જોકે થોડા દિવસ પહેલાં તેલંગણના નિઝામાબાદમાં નર્સનું કામ કરતી મહિલાએ પોતાના પતિની નિર્દયી હત્યા કરી હતી. તેનો હત્યા કરવાનો તરીકો જબરદસ્ત ચોંકાવનારો હતો. મહિલાએ પહેલાં પતિને એક બિલ્ડિંગની છત પરથી ધક્કો મારીને પતાવી દેવાની કોશિશ કરી હતી. જોકે આ અકસ્માતમાં પતિ ગંભીર રીતે ઘાયલ થયો હતો, પરંતુ જીવ બચી ગયો હતો. હૉસ્પિટલમાં તેની સારવાર ચાલી રહી હતી. આ અકસ્માતમાં તે બચી ન જાય એ માટે નર્સ તરીકે કામ કરતી પત્નીએ તેનું ખુરાફાતી દિમાગ ચલાવ્યું હતું. હૉસ્પિટલમાં પતિને ગ્લુકોઝના બાટલા ચડી રહ્યા હતા એ વખતે એમાં નર્સ પત્નીએ ટૉઇલેટ ક્લીનર ભેળવી દીધું હતું. આ ઝેરી કેમિકલ પતિના આખા શરીરમાં લોહી દ્વારા ફરી વળતાં તેનું મૃત્યુ થઈ ગયું હતું. રિકવર થઈ રહેલો દરદી કઈ રીતે અચાનક મૃત્યુ પામ્યો એ બાબતે હૉસ્પિટલે તપાસ કરતાં ગ્લુકોઝના બાટલામાં ટૉઇલેટ ક્લીનર કેમિકલની હાજરી જોવા મળી હતી. પોલીસે આ મામલે પત્નીની કડક પૂછતાછ કરતાં હકીકત બહાર આવી હતી. પોલીસે મરનારની પત્ની અને પ્રેમીને પકડી લીધાં હતાં.