03 February, 2026 10:57 AM IST | Leh | Gujarati Mid-day Correspondent
સુફિયા
રાજસ્થાનના અજમેરમાં રહેતી અલ્ટ્રા મૅરથૉન રનર સુફિયા સુફીએ દોડવાનો અનોખો વર્લ્ડ રેકૉર્ડ પોતાના નામે કર્યો છે. તેણે મનાલીથી લેહ સુધીની ૪૮૦ કિલોમીટરની મૅરથૉન ૧૦૦ કલાકની અંદર પૂરી કરી હતી. સુફિયાએ મનાલીથી લેહ સુધી ૯૮.૨ કલાક સુધી દોડીને ગિનેસ વર્લ્ડ રેકૉર્ડ બનાવ્યો છે.
૨૦૨૧માં સુફિયાએ આટલું જ અંતર કાપવા માટે ૧૫૬ કલાકનો સમય લીધો હતો. જોકે એ કારનામાને કારણે તેને હિમાલયનો હાઇવે દોડીને પાર કરનાર મહિલાનો ખિતાબ મળ્યો હતો. હવે તેણે પોતાનો જ રેકૉર્ડ તોડીને ૧૦૦ કલાકની અંદર જસ્ટ ૯૮.૨ કલાક સતત દોડીને એક માણસની સહનશક્તિની નવી ચરમસીમા પાર કરી હતી. ૪૮૦ કિલોમીટરનો આ રસ્તો દુનિયાના સૌથી મુશ્કેલ ટ્રેકમાંનો એક છે, કેમ કે એમાં લગભગ ૧૭૦૦૦ ફુટ ઊંચો પહાડી વિસ્તાર દોડીને પાર કરવાનો છે. દોડ દરમ્યાન ઝીરોથી નીચા તાપમાનમાં અને ૫૬ ટકાથી ઓછા ઑક્સિજન-લેવલ પર તેની કસોટી થઈ હતી. સુફિયાનું આ કારનામું ૨૦૨૩માં થયું હતું. એ વખતે ગિનેસ વર્લ્ડ રેકૉર્ડ્સ દ્વારા તમામ પરિમાણો મૉનિટર કરવામાં આવ્યાં હતાં. જોકે આ કારનામાને ઑફિશ્યલ ગિનેસ વર્લ્ડ રેકૉર્ડનું સર્ટિફિકેટ આપવાનું કામ તાજેતરમાં થયું છે. લગભગ બે વર્ષ પછી સુફિયાને તેના વિશ્વવિક્રમનું પ્રમાણપત્ર મળ્યું છે.
