16 October, 2026 02:42 PM IST | Mumbai | Gujarati Mid-day Correspondent
વાઇરલ વિડિયોમાંથી સ્ક્રીનશોટ
ઇન્સ્ટાગ્રામ પર મૂલચંદજી નામનો એક પથ્થર સોશ્યલ મીડિયાનો સ્ટાર બની ગયો છે. કોઈ પથ્થર કઈ રીતે ફેમસ બને? ઇન્ટરનેટના જમાનામાં બધું જ થાય. જો પોતાના પેટ ડૉગ કે પેટ કૅટનું ઇન્સ્ટાગ્રામ અકાઉન્ટ બનાવી શકાય તો પોતાને ગમતા પથ્થરનું કેમ નહીં? બસ, એક ભાઈએ ૧૧ મહિના પહેલાં એક પથ્થરનું ઇન્સ્ટાગ્રામ અકાઉન્ટ બનાવ્યું હતું અને રોજ એ પથ્થરની જર્ની રેકૉર્ડ કરી હતી. આ ભાઈ રોજ આ પથ્થર લઈને ચાલવા જતા અને તેને ઠોકર મારીને આગળ ધકેલતા રહેતા. ઠોકરો ખાઈ-ખાઈને પથ્થરની સિકલ પણ બદલાઈ ગઈ હતી. આ અકાઉન્ટ બનાવનાર ભાઈનો ટાર્ગેટ છે કે પથ્થરને ઠેબે ચડાવીને એને ગોળ આકાર આપવો. જ્યારે આ અકાઉન્ટ શરૂ થયું ત્યારે પથ્થરનું વજન હતું ૧૬૧૫ ગ્રામ, હવે એ રહ્યું છે માત્ર ૩૬૯ ગ્રામ. ૧૧ મહિનાથી એને રોજ ઠેબે ચડાવીને એનો શેપ બદલવાની કોશિશ કરવામાં કેટલી સફળતા મળી છે એ રીલમાં શૅર કરવામાં આવે છે. એ પથ્થરને એક અલગ ઓળખ આપવા માટે એનું નામ મૂલચંદજી પાડવામાં આવ્યું છે. stonejourney23 નામના અકાઉન્ટ પર મૂલચંદજીની સફર બતાવનાર ભાઈનું કહેવું છે કે ૧૧ મહિનામાં પથ્થરને ઠોકર મારવામાં તેનાં ૭ જોડી જૂતાં ખરાબ થઈ ગયાં છે. નવાઈની વાત એ છે કે ૧૧ મહિનામાં એક પણ વાર આ ભાઈએ રીલમાં પોતાનો ચહેરો નથી બતાવ્યો. માત્ર આ પથ્થરને જોવા માટે જ આ અકાઉન્ટનાં ૮૦,૦૦૦ ફૉલોઅર્સ બની ગયા છે.
