ક્રૂઝ પર વધુ દારૂ પીવાથી મહિલા પડી ગઈ, કંપનીએ ૨.૩ કરોડનું વળતર ચૂકવવું પડશે

એ શૉટ્સ પીધા પછી તે જેવી બારમાંથી નીકળી કે તરત સીડીઓ પરથી પડી ગઈ

૨૦૨૪ની સાલમાં ડાયના સૅન્ડર્સ નામની ૪૫ વર્ષની મહિલા કાર્નિવલ રેડિઅન્સ ક્રૂઝ પર ગઈ હતી

અમેરિકામાં એક મહિલાને ક્રૂઝ ટ્રિપ પર વધુપડતો દારૂ સર્વ કરવાનું કંપનીને ભારે પડી ગયું હતું. ૨૦૨૪ની સાલમાં ડાયના સૅન્ડર્સ નામની ૪૫ વર્ષની મહિલા કાર્નિવલ રેડિઅન્સ ક્રૂઝ પર ગઈ હતી. એ વખતે ૯ કલાકની અંદર તેને ૧૪ ટકીલા શૉટ્સ સર્વ કરવામાં આવ્યા. એ શૉટ્સ પીધા પછી તે જેવી બારમાંથી નીકળી કે તરત સીડીઓ પરથી પડી ગઈ. એને કારણે તેની પીઠ અને માથામાં ઈજા થઈ હતી. ઈજાને કારણે તે જ્યાં બેહોશ થઈને પડી ગઈ એ વિસ્તાર ક્રૂ-ઓન્લી એરિયા હતો. ઇન્જર્ડ થવાને કારણે તેની ક્રૂઝની મજા બગડી ગઈ. આ ઘટના પછી ડાયનાએ કોર્ટમાં કેસ કર્યો હતો. કેસની સુનાવણી દરમ્યાન જ્યુરીએ એ વાતની નોંધ લીધી કે કંપનીએ લાપરવાહી કરી હતી કે મહિલા નશાની હાલતમાં હતી છતાં તેને ટકીલા શૉટ્સ સર્વ કરવામાં આવ્યા. આ આધાર પર કોર્ટે ડાયનાને વળતર આપવાનો આદેશ કર્યો હતો.