17 October, 2026 09:03 PM IST | New Delhi | Gujarati Mid-day Correspondent
ટ્રેન છે કે પાનનો ગલ્લો?
ભારતીય રેલવેમાં મુસાફરી દરમ્યાન અવારનવાર વિચિત્ર અને આશ્ચર્યજનક દૃશ્યો જોવા મળતાં હોય છે, પરંતુ મુંબઈથી છત્તીસગઢ જઈ રહેલી એક ટ્રેનમાંથી સામે આવેલો વિડિયો જોઈને લોકો દંગ રહી ગયા છે. આ ટ્રેનના 3 AC કોચમાં એક પાનવાળો આરામથી લોઅર બર્થ પર બેસીને મુસાફરો માટે તાજાં પાન બનાવતો દેખાય છે.
ટ્રેનમાં પાન બનાવવાનો આ દેશી અંદાજ મુસાફરો માટે ભારે આકર્ષણનું કેન્દ્ર બન્યો હતો. તેણે ટ્રેનની સીટ પર એક કપડું પાથરી દીધું હતું અને એના પર કાથો, ચૂનો, સોપારી સહિતની સામગ્રી ગોઠવીને આરામથી પાન બનાવવાની શરૂઆત કરી હતી. વિડિયો રેકૉર્ડ કરનારા મુસાફરે જણાવ્યું કે આ પાનવાળાને ટ્રેનમાં જ મુસાફરો તરફથી આશરે વીસથી પચીસ પાનનો મોટો ઑર્ડર મળ્યો હતો, જેથી તે બધા માટે એકસાથે પાન તૈયાર કરી રહ્યો હતો.
ટ્રેનના રિઝર્વ્ડ કોચમાં આ રીતે ખુલ્લેઆમ પાન બનાવવાની બાબત રેલવેના નિયમો અને મુસાફરોની સુરક્ષા વિશે ગંભીર સવાલ ઉઠાવે છે. કેટલાકે રેલવેતંત્રને ટૅગ કરીને ગેરકાયદે ફેરિયાઓ સામે તપાસ કરવાની માગણી કરી છે.
આર્ટિફિશ્યલ ઇન્ટેલિજન્સ (AI) ભવિષ્યમાં એટલું સક્ષમ બની જશે કે કૅન્સર જેવા અસાધ્ય રોગનો પણ ઇલાજ શોધી કાઢશે એવા આંધળા વિશ્વાસમાં કેટલાક AI રિસર્ચર્સે સિગારેટ પીવાનું શરૂ કરી દીધું હોવાનો ચોંકાવનારો દાવો એક કંપનીના ચીફ ટેક્નૉલૉજી ઑફિસર (CTO) શ્યામ શંકરે કર્યો છે. સિલિકૉન વૅલીમાં આ ટેક્નૉલૉજીને લઈને પ્રવર્તતા અતિરેક અને ભ્રમણાઓની આકરી ટીકા કરતી વખતે તેમણે આ વાત કહી હતી.
એક જાહેર કાર્યક્રમમાં બોલતાં શ્યામ શંકરે કહ્યું કે ઘણા AI સંશોધકોએ અન્ય રિસર્ચર્સને એ દર્શાવવા માટે સ્મોકિંગ શરૂ કરી દીધું છે અને તેમનું માનવું છે કે AI ચોક્કસપણે કૅન્સરનો ઇલાજ શોધી લેશે એટલે તેઓ જાણે આખી બાજી એના દાવ પર લગાવી રહ્યા છે. અલબત્ત, શ્યામ શંકરે આ દાવાના સમર્થનમાં કોઈ પુરાવા કે ચોક્કસ સંશોધકોનાં નામ આપ્યાં નહોતાં.
