ઑસ્ટ્રેલિયન ઑલરાઉન્ડર ગ્લેન મૅક્સવેલ ભારત સામેની T20 સિરીઝથી વાપસી કરશે

આગામી મૅચો માટે ઑસ્ટ્રેલિયાએ પોતાની સ્ક્વૉડમાં ૯ ફેરફાર કર્યા

ગ્લેન મૅક્સવેલ

ઑસ્ટ્રેલિયાનો પ્રભાવશાળી ઑલરાઉન્ડર ગ્લેન મૅક્સવેલ હાથના કાંડાના ફ્રૅક્ચરમાંથી સ્વસ્થ થયા બાદ ભારત સામેની T20 સિરીઝથી વાપસી કરવા માટે તૈયાર છે. ગઈ કાલે ક્રિકેટ ઑસ્ટ્રેલિયાએ અંતિમ વન-ડે અને પાંચ મૅચની T20 સિરીઝ માટે સ્ક્વૉડમાં કેટલાક ફેરફાર કરવાની જાહેરાત કરી હતી. ભારત સામેની આગામી રમતો માટે કુલ ૯ ફેરફાર કરવામાં આવ્યા છે. 

સ્ટાર બૅટર માર્નસ લબુશેનને શેફીલ્ડ શીલ્ડ ટુર્નામેન્ટમાં રમવાનું હોવાથી વન-ડે સ્ક્વૉડમાંથી બહાર કરવામાં આવ્યો છે. યંગ બૅટર કૅમરન ગ્રીનના સ્થાને લબુશેનને સ્થાન મળ્યું હતું, પણ તેને એક પણ મૅચ રમવા મળી નહોતી. ફાસ્ટ બોલિંગ ઑલરાઉન્ડર જૅક એડવર્ડ્સ અને ડાબોડી સ્પિનર ​​મૅટ કુહનેમૅનને અંતિમ વન-ડે માટે સ્ક્વૉડમાં સ્થાન મળ્યું છે. 

ડોમેસ્ટિક ટુર્નામેન્ટ શેફીલ્ડ શીલ્ડના કમિટમેન્ટને કારણે ફાસ્ટ બોલર જોશ હેઝલવુડ અને બોલિંગ ઑલરાઉન્ડર શૉઁ અબૉટ અનુક્રમે પ્રથમ, બીજી અને ત્રીજી T20 મૅચ સુધી જ ઉપલબ્ધ રહેશે. ઑલરાઉન્ડર ગ્લેન મૅક્સવેલ (ત્રીજીથી પાંચમી મૅચ), ફાસ્ટ બોલર બેન દ્વાશસ (અંતિમ બે મૅચ), વિકેટકીપર-બૅટર જોશ ફિલિપ (આખી સિરીઝ) અને ફાસ્ટ બોલર માહલી બિઅર્ડમૅન (ત્રીજીથી પાંચમી મૅચ)ને T20 સ્ક્વૉડમાં સ્થાન મળ્યું છે.